Қытайлар Африкадағы ең ұзын теміржол көпіріне рельс төсеуді аяқтады
«China Railway Construction» корпорациясы PK330 көпірінде рельс төсеу жұмыстарын аяқтағанын мәлімдеді. Бұл көпір — ауыр жүк вагондарына арналған Африкадағы ең ұзын көпір. Оқиға Алжирдегі Батыс тау-кен теміржол жобасын жүзеге асырудағы маңызды кезеңге айналды, деп хабарлайды Rail-news.kz.
Алжирден оңтүстік-батысқа қарай шамамен 1250 километр қашықтықта орналасқан Тиндуф провинциясындағы алты шақырымдық көпір — 575 километрлік негізгі жолдың техникалық тұрғыдан ең күрделі учаскесі. Ол Бешар провинциясын әлемдегі ең ірі темір рудасы кен орындарының бірі — Гара-Джебилетпен байланыстырады.
Корпорация хабарлағандай, қытайлық және алжирлік мамандар Сахараның қатаң жағдайында жұмыс істеп, аса жоғары температура, құмды дауылдар және су тапшылығына тап болған.
Көпірдің негізгі конструкциясын тек бір жылда салған. Жобаның арқасында жергілікті тұрғындарға 7 мыңнан астам жұмыс орны ашылып, 1 мыңнан астам білікті маман даярланған.
Теміржол жобасына 19 көпір кіріп, олардың жалпы ұзындығы 12,2 километрді құрайды.
Батыс тау-кен теміржолы «Бір белдеу, бір жол» бастамасының флагмандық жобасына айналды. Оның мақсаты — Алжирдің оңтүстік-батысындағы кен орындары, өнеркәсіптік аймақтар мен порттарды байланыстыру. Жол пайдалануға берілгеннен кейін аймақтың көлік желісін нығайтып, экономикалық дамуына үлес қосуы күтілуде.