Сауд Арабиясы мен Катар арасында жоғары жылдамдықты теміржол желісі салынады
Сауд Арабиясы мен Катар үкіметтері Эр-Рияд пен Доха қалаларын жалғайтын жаңа жоғары жылдамдықты теміржол желісін салу туралы ресми келісімге қол қойды, деп хабарлайды Rail-news.kz.
Сауд Арабиясының БАҚ құралдары таратқан мәліметке сүйенсек, жаңа «жоғары жылдамдықты электрлі теміржол» Эр-Риядтағы Король Салман атындағы халықаралық әуежай мен Дохадағы Хамад халықаралық әуежайын байланыстырады. Пойыз жол бойында Сауд Арабиясының Әл-Хуфуф және Даммам қалаларына аялдайды. Пойыздар сағатына 300 шақырымнан жоғары жылдамдықпен жүреді, бұл екі астана арасындағы жол уақытын 2 сағатқа дейін қысқартуға мүмкіндік береді.
Маңызды құжатқа 8 желтоқсанда Сауд Арабиясының тақ мұрагері Мұхаммед бен Салман мен Катар әмірі шейх Тәмим бен Хамад Әл Танидің Эр-Риядтағы кездесуі барысында қол қойылды. Бұл қадам 2017 жылғы дипломатиялық және көліктік шектеулерден кейін екі ел арасындағы қарым-қатынастың жақсара түскенін айғақтайды.
Тараптардың бірлескен мәлімдемесінде жобаны алты жыл ішінде аяқтау жоспарланып отырғаны айтылған. Болжам бойынша:
Жоба екі елде 30 000 жаңа жұмыс орнын (тікелей және жанама) ашуға мүмкіндік береді.
Теміржол іске қосылғанда жылына 10 миллионға жуық жолаушыны тасымалдайды деп күтілуде.
Бұл Сауд Арабиясы үшін 2018 жылы ашылған Джидда – Мекке – Медина бағытынан кейінгі екінші жоғары жылдамдықты желі болмақ. Сонымен қатар, бұл өңірдегі елдерді өзара байланыстыратын алғашқы трансшекаралық жүйе ретінде тарихқа енбек. Осыған дейін Катар елдегі алғашқы магистральды теміржол — Дохадан Сауд Арабиясымен шекарадағы Әбу-Самраға дейінгі желі құрылысын мақұлдаған болатын. Қазіргі уақытта Біріккен Араб Әмірліктері де (БАӘ) Дубай мен Әбу-Даби арасында осындай жоғары жылдамдықты желіні дамытып жатыр.