Түркия алғашқы жүрдек электр пойызын сынақтан өткізбек

Түркияның Көлік министрі Абдулқадыр Уралоғлы елдегі алғашқы, жылдамдығы сағатына 225 шақырымға дейін жететін электр пойызының құрылысы аяқталғанын және оның сынақтары 2026 жылғы наурызға жоспарланғанын мәлімдеді, деп хабарлайды Rail-news.kz. 

Пойыз мемлекеттік TÜRASAŞ компаниясында жасалған және 577 жолаушыны тасымалдауға есептелген. Оның құрамында корпусы алюминийден жасалған сегіз вагон бар. Мұндай пойызды жобалау туралы TÜRASAŞ 2024 жылдың қыркүйегінде хабарласа, бір жылдан кейін Түркияның солтүстік-батысында жүйрік жылжымалы құрам шығаратын зауыттың құрылысы басталғаны белгілі болған еді.

Жаңа пойыздың вагондары желдету, жолаушыларды ақпараттандыру, бейнебақылау жүйелерімен, сондай-ақ Wi-Fi нүктелерімен және вендинг аппараттарымен жабдықталған. Пойызда мүгедектер арбасына таңылған жолаушыларға арналған екі орын және асханасы бар мейрамхана қарастырылған.

TÜRASAŞ компаниясы 2028 жылға дейінгі кезеңде осындай тағы 14 пойыз құрастыруы тиіс. Олар Siemens және CAF компаниялары жеткізген және қазір елдің теміржолдарында қатынап жүрген жоғары жылдамдықты экспрестер паркін толықтырады.