Түркия Еуразияның басты көлік хабына айналуды көздейді
Түркия мен Еуропалық одақ өткен аптада елдің теміржол саласындағы интермодальды тасымалдарды дамытуға бағытталған бірлескен жобаны сәтті аяқтады. Жоба жүк тасымалының тиімділігін арттырып, көлік инфрақұрылымына алдағы инвестициялардың негізін қалауды мақсат етеді, деп хабарлайды Rail-news.kz.
Анкарада жобаның жабылу рәсімінде Еуропалық комиссияның кеңею және көршілік саясаты жөніндегі комиссары Марта Кос Еуропалық одақ пен еуропалық қаржы институттарының қолдауымен Түркияда шамамен 1 мың шақырым теміржол жаңғыртылып, тағы 156 шақырым жаңа теміржол желісі салынғанын айтты.
Алайда бұл Түркия жүзеге асырып жатқан ауқымды жаңғырту жұмыстарының бір бөлігі ғана. Елдің Көлік және инфрақұрылым министрі Абдулкадир Уралоғлудың айтуынша, соңғы 24 жылда көлік және инфрақұрылым саласына 355 млрд АҚШ доллары көлемінде инвестиция тартылған.
Осы кезеңде елдегі теміржол желісінің ұзындығы 2002 жылғы шамамен 11 мың шақырымнан бүгінде 14 мың шақырымға дейін ұлғайған. Қазір тағы 4 164 шақырым теміржол құрылысы жалғасып жатыр.
Түркия 2028 жылға қарай теміржол желісінің ұзындығын 17 287 шақырымға жеткізуді жоспарласа, 2053 жылға қарай бұл көрсеткішті 30 мың шақырымға жуықтатуды көздеп отыр.
Министр Абдулкадир Уралоғлу Түркияның Еуразиядағы негізгі көлік-логистикалық хабқа айналу мақсатын тағы бір мәрте атап өтті.
«Бір жағынан, біз Орталық Азия мен Қиыр Шығыстан Еуропаға бағытталған Орта дәлізді байланыстырып отырмыз. Екінші жағынан, Парсы шығанағы өңірі мен Басра портын Түркия және Еуропамен ұзындығы 1 200 шақырым болатын теміржол және автомобиль жолдары арқылы жалғауды жоспарлап отырмыз. Бұл бағытта Еуропалық одақпен ынтымақтастық біздің жұмысымызды жеңілдетеді», – деді министр.