Бавария алғашқы сутекті пойызын желтоқсанда іске қосады

Германияның Бавария аймағында алғашқы сутекпен жүретін пойыздар желтоқсанда жолаушылар тасымалына шығуға дайындалып жатыр, деп хабарлайды Rail-news.kz.

Deutsche Bahn мен Siemens Mobility Мюльдорф қаласында үш жаңа пойызды таныстырды. Екі вагоннан тұратын Mireo Plus H пойыздары Мюльдорф – Тюслинг – Бургхаузен бағытындағы 32,3 шақырымдық электр тартылмаған желіде қатынайды. Маршрутта сегіз станция бар.

Пойыздардың әрқайсысында велосипедке арналған тоғыз орын, төмен еденді кіреберіс және мобильді байланыс сапасын жақсартатын арнайы терезелер қарастырылған. Сондай-ақ құрамдар ETCS қауіпсіздік жүйесімен жабдықталған.

Siemens мәліметінше, пойыздардың ең жоғары жылдамдығы сағатына 140 шақырым, ал бір рет сутекпен толтырылғаннан кейінгі жүріс қоры 1200 шақырымға дейін жетеді. Жанармай құю шамамен 15 минут уақыт алады.

Сутек Мюльдорфта DB Energie салған жаңа станция арқылы беріледі. Нысан 100 пайыз жаңартылатын электр энергиясын пайдаланады.

Жобаға Германияның федералдық бюджеті 8,2 млн еуро көлемінде қаржы бөлген. Оның 4,4 млн еуросы пойыздарға, 3,8 млн еуросы сутек құю инфрақұрылымына бағытталған.

Қазір пойыздар сынақтан өтіп, машинистер оқытылуда. Негізгі кезең желтоқсандағы жаңа теміржол кестесінің енгізілуімен басталады.