Үндістан Африка теміржол нарығындағы үлесін арттырып келеді
Үндістан теміржол техникасын Африка елдеріне экспорттауды кеңейтіп жатыр. Indian Railways компаниясының экспорттық бөлімшесі RITES Оңтүстік Африка Республикасында өз филиалын ашты, деп хабарлайды Rail-news.kz.
Бұған дейін RITES жергілікті Volantis инвестициялық компаниясымен 35,8 млн долларға 10 магистральдық тепловоз жеткізу жөнінде алдын ала келісімге келген. Локомотивтер келісімшартқа қол қойылғаннан кейін 20 ай ішінде жеткізілуі тиіс.
Қуаты 2942 кВт болатын тепловоздар ені 1067 мм теміржол табанына бейімделеді. Олар Варанасидегі Indian Railways құрамына кіретін BLW зауытында америкалық Progress Rail технологиялары негізінде шығарылады.
RITES бұған дейін де Африка нарығында бірнеше ірі келісімшартқа қол жеткізген. 2022 жылдан бері компания Мозамбикке 16 тепловоз, бес дизельді пойыз, 60 жолаушылар вагоны және 300 жартылай вагон жеткізді. 2026 жылдың басында тағы алты локомотивке 20,6 млн долларлық тапсырыс түсті.
Компания Оңтүстік Африка, Зимбабве және басқа елдер үшін пайдаланылған үнді тепловоздарын жаңғыртып, оларды Африкадағы теміржол табанына бейімдеу бағытында да жұмыс істеп жатыр. Мұндай келісімшарттардың жалпы құны 71 млн доллардан асады.
Үндістан Африкадағы теміржол нарығына мемлекеттік RITES-пен ғана емес, жеке компаниялар арқылы да шығуда. Мәселен, Texmaco Rail Оңтүстік Африкадан жүк вагондары мен локомотивтерге тапсырыстар алып, болашақта өндірісті осы елде жергіліктендіру мүмкіндігін қарастырып жатыр.
Бұл қадамдар Үндістанның экспортқа бағытталған жаңа Make for the World стратегиясымен үндеседі. Ел теміржол техникасының сыртқы нарықтағы үлесін арттыруды көздеп отыр. Соның ішінде Vande Bharat электр пойызының экспорттық нұсқасын әзірлеу жұмыстары жүргізілуде.