Түркияда Черкезкөй – Капыкуле жоғары жылдамдықты теміржол желісінің ұзындығы 153 шақырым болатын учаскесі пайдалануға берілді , деп хабарлайды Rail-news.kz.
Бұл желі Халкалы – Капыкуле теміржол магистралінің бір бөлігі саналады және Қытай мен Еуропаны Қазақстан арқылы байланыстыратын Транскаспий халықаралық көлік бағытының мүмкіндіктерін кеңейтуге бағытталған.
Түркияның көлік және инфрақұрылым министрі Абдулкадир Уралоглу атап өткендей, екі жолды, электрлендірілген учаске елдің Еуропамен көлік байланысын нығайтып, жолаушылар мен жүк тасымалының тиімділігін арттыруға мүмкіндік береді.
Жобаның аяқталуы Халкалы – Капыкуле бағыты бойынша жол жүру уақытын едәуір қысқартуға тиіс. Жолаушылар сапарға бұрынғы төрт сағаттың орнына бір жарым сағат жұмсайды деп күтілуде. Ал жүк тасымалының уақыты үш жарым сағатқа дейін қысқарып, қазіргі көрсеткішпен салыстырғанда бес сағат үнемделеді.
Министрдің мәліметінше, теміржол желісінің өткізу қабілеті төрт есе артады. Жылдық жолаушылар ағыны алты жүз мыңнан үш миллион адамға дейін, ал жүк тасымалы бір жарым миллион тоннадан тоғыз жарым миллион тоннаға дейін ұлғаяды деп жоспарланған.
Жаңа желі Ыстамбұл, Коджаэли, Текирдаг және басқа да қалалардағы өнеркәсіптік аймақтар мен порттардың Еуропа нарықтарына шығуын жеңілдетеді. Абдулкадир Уралоглуның айтуынша, 2024 жылы Түркияның теміржол арқылы жүзеге асырылған экспорттық тасымалының 86 пайызы осы көлік дәлізі арқылы өткен.
Түркия соңғы онжылдықтарда теміржол инфрақұрылымын, соның ішінде жоғары жылдамдықты магистральдарды белсенді түрде дамытып келеді. 2002 жылдан бері елдегі теміржол желісінің жалпы ұзындығы он бір мың шақырымнан он төрт мың шақырымға дейін өскен. Оның ішінде екі мың екі жүз елу бір шақырым жоғары жылдамдықты теміржол желілеріне тиесілі.
Елдің теміржолды дамыту жоспарына сәйкес, 2028 жылға қарай жоғары жылдамдықты пойыздар қатынайтын провинциялар саны он бірден жиырма жетіге дейін көбейтілмек. Ал 2053 жылға қарай мұндай желілерді бүкіл ел аумағына тарату көзделіп отыр. Нәтижесінде Түркияның кез келген нүктесіне жету уақытын 48 сағатқа дейін қысқарту жоспарланған.
Транскаспий бағыты үшін маңызы
Черкезкөй – Капыкуле учаскесінің іске қосылуы Қазақстан, Әзербайжан, Грузия және Түркия арқылы Қытай мен Еуропаны байланыстыратын Транскаспий халықаралық көлік бағытының батыс бөлігін дамытуға ықпал етуі мүмкін. Теміржол инфрақұрылымының өткізу қабілеті артып, тасымал уақыты қысқарған жағдайда, бұл бағыт халықаралық жүк ағындары үшін тиімді баламаға айналу мүмкіндігін күшейтеді.
