Орталық Азия - Еуропа жүк тасымалына Венгрия терминалының инфрақұрылымы пайдаланылмақ
«Қазақстан теміржолшысы» газетінің тілшісі
Қазақстан Орталық Азияға транзиттік тасымалды Венгрия арқылы дамытуды көздеп отыр. Осы орайда «Celiz Орталық-Еуропалық логистика және өнеркәсіптік аймақ» жобасының өкілдері мен «KTZ Express» АҚ басқарма басшысы Нұрлан Игембаев меморандумға қол қойды, деп хабарлайды Rail-news.kz. Тараптар Қытай мен Еуропа арасындағы теміржол арқылы жүк тасымалы алдағы жылдары айтарлықтай артатынына сенім білдірді. Еуропаға келетін қытайлық тауарлардың тасымал логистикасы мен көлемінің өсуі тар және кең шанақты теміржол магистралі түйіспелеріндегі түсіріп-тиеу бойынша инфрақұрылымды дамытуды қажет етеді. Осыған орай транзиттік тасымалды қамтамасыз ету үшін жаңа бағдар ретінде Венгрияның Захони терминалы инфрақұрылымын пайдалану бойынша жұмыстар жүргізілуде.
– Қазақстан ел аумағындағы барлық бағдарлар бойынша жүк көлемін арттыруға бағытталған жұмыстарды үздіксіз жүргізіп келеді. Біз бұл жағынан айтарлық өсім барын байқадық, транзиттік контейнерлік тасымал көлемі 2021 жылдың 9 айында 795 мыңнан астам ДФЭ құрады. Бұл былтырғы сәйкес кезеңге қарағанда 28% көп. Қазақстан арқылы контейнерлік бағдарларға сұраныс өте жоғары. Сонымен қатар KTZ Express ҚХР – ЕО бағыты бойынша ресейлік, Балтық маңы порттары және ТХКБ арқылы қосымша бағдарларды дамыту жөнінен жұмыстар жүргізуде. Олардың қатарында Түркияға контейнерлік пойыздармен Қазақстан бидайын және Қытайға open top контейнерлері арқылы, ал Таяу Шығыс, Африкаға, Орталық Еуропаға әмбебап контейнерлермен көмір экспорттау бойынша жаңа жобалар бар, – деді «KTZ Express» АҚ басқарма басшысы Нұрлан Игембаев.
Теміржол көлігі сонымен қатар қоршаған ортаға зиянды аз келтіру жағынан да тиімді. Венгрия және Қазақстан тарапы Венгрия арқылы Орталық Азияға транзиттік тасымалды дамыту іскерлік қатынастарды дамытуға тың серпін береріне сенімді.