Қазақстан мен Қытай арасындағы жүк тасымалына қатысты келіссөздер нәтижесін бере бастады
«Қазақстан теміржолшысы» газетінің тілшісі
Қытай тарапы Қазақстанға бағытталған теміржол құрамдарының санын арттыруға және қазақстандық тарапта тұрып қалған жүктерді қабылдауға ниетін білдірді. Осылай, Қазақстан мен Қытай мүдделі мемлекеттік органдары арасында COVID-19 жағдайында Қазақстан-Қытай шекарасындағы өткізу бекеттерінің жұмыс істеуі туралы келіссөздер нәтижесін беруде деуге болады. Ағымдағы жылдың 11 қарашасында өткен келіссөзде тараптар көліктік-коммуникациялық өзара байланысты және аймақаралық байланыстарды нығайтуға, сауда-экономикалық ынтымақтастықтың сапасын арттыруға жәрдемдесуге бағытталған бұрын жоғары деңгейде қол жеткізілген уағдаластықтарды ұстанатындықтарын растады. Нәтижесінде тараптар Қазақстан-Қытай мемлекеттік шекарасының автомобиль және теміржол өткізу бекеттерінде өткізу қабілетін арттыру, автокөлік құралдары мен жүктерге қатысты эпидемияға қарсы іс-шаралар жүргізу бойынша бірлескен шаралар қабылдау туралы уағдаласты. Қытай тарапы жақын арада ҚР бағытындағы теміржол құрамдарының санын арттыру және қазақстандық тарапта тұрып қалған жүктерді қабылдау ниетін растады.