ТХКБ жүк ағынының артуы инфрақұрылымға салмақ түсіріп жатыр

Транскаспийлік халықаралық көлік бағдары бойынша жүк ағыны көбейген. Биылғы жылдың бес айында ТХКБ арқылы контейнер тасымалы 42 пайызға артып отыр. Бұл белгілі бір деңгейде осы бағдардағы инфрақұрылымға күш түсіруде.

Себебі басқа бағдарлар бойынша жүк жөнелтіп келген экспортерлердің бір бөлігі ТХКБ бағытына көше бастаған. «ТХКБ» халықаралық қауымдастығының бас хатшысы Гайдар Абдикеримовтың айтуынша, жүк ағынының кенеттен күрт артуына орай бүгінде инфрақұрылымды ұлғайтуға байланысты ауқымды жұмыстар атқарылуда. Қазіргі таңда бұл бағдарды 8 ел, атап айтқанда, Қытай, Қазақстан, Әзірбайжан, Түркия, Румыния, Грузия, Украина, Польша елдері пайдаланып отырса, жыл соңына қарай олардың қатары тағы да артады деген болжам бар. Өйткені қауымдастыққа мүше болғысы келетіндер қатары өте көп.

– Ресми түрде біздің бағдармен тасымалдауға өтінім берілген жүктер көлемі 10 млн тоннадан асты. Әрине біз бұған дайын болмадық. Осыған орай бұл мүмкіндік тиімді пайдаланып, жылдамдатып өткізу қабілетімізді арттырып, жоспарлауға септік ететін өзара іс-қимылдың бірнеше үлгілерін ұсындық, – дейді бас хатшы.

Ол сондай-ақ бағдар бойынша осал тұстарды да атап өтті. Солардың бірі Каспий телімі. Мұнда әсіресе, теміржол бойынша паром кемелері жетіспейді екен. Бұл теңізде 5 мемлекеттің бассейні бар, соның ішінде Қазақстанда осы мәселе кездеседі. Екі апта бұрын ҚР индустрия және инфрақұрылымды дамыту министрлігі биыл 4 паром құрылысы салынатынын мәлімдеген. Дегенмен соның өзі бүгінгі артып отырған жүк ағыны бойынша тасымалды толық қамтамасыз етуге аздық ететін түрі бар. Бас хатшынынң айтуынша, тағыс бір фактор пандемия кезінде бұл бағдарлар жұмысы тоқтап қалып, енді қайта ашылғанда экспортерлер өткен жылда жіберіп алған тасымал көлемін екі есе жүктемемен өткізуге тырысуда екен. Бұл да аталған бағдар жүктемесін арттыра түскен. Дегенмен «ТХКБ» қауымдастығы тарапынан туындап отырған түйткілді мәселелерді шешіп, сұранысты толық қанағаттандыру үшін нақты шаралар қолға алынып жатыр екен.