Қазақстандағы жүк айналымының 57%-ы теміржол арқылы жүзеге асырылады
Қазақстанда жалпы жүк айналымының 57%-ы теміржол көлігіне тиесілі. Сонымен қатар, бұл сала көлік индустриясының жалпы өнімінің шамамен үштен бірін қамтамасыз етіп отыр. Бұл туралы Үкімет отырысында Көлік министрі Нұрлан Сауранбаев мәлімдеді, деп хабарлайды Rail-news.kz.
Министрдің айтуынша, еліміздегі жүк вагондары нарығы толықтай бәсекелестік ортада жұмыс істейді. Қазіргі таңда Қазақстандағы вагондар паркі шамамен 147 мың бірлікті құрайды, олардың басым бөлігі жеке операторлардың иелігінде.
Нұрлан Сауранбаев теміржол инфрақұрылымын дамыту өнеркәсіп өндірісінің өсуіне, экспорт көлемінің артуына және елдің транзиттік әлеуетінің нығаюына тікелей әсер ететінін атап өтті. Оның сөзінше, саланы дамыту жұмыстары локомотивтер паркін жаңарту, вагондар паркін жетілдіру және магистральдық желілердің өткізу қабілетін арттыру бағытында жүргізілуде.
Министр 2014-2019 жылдары тартқыш жылжымалы құрамды сатып алу көлемінің төмен болуына байланысты локомотив тапшылығы қалыптасқанын айтты. Бұл мәселені шешу үшін соңғы жылдары жаңарту бағдарламасы қолға алынған. Отандық өндірісте шығарылған жаңа локомотивтерді пайдалануға енгізу 2028 жылға дейін жалғасады.
Жүргізілген жаңғырту жұмыстарының нәтижесінде локомотивтердің тозу деңгейі 74 пайыздан 49 пайызға дейін төмендеген. Сондай-ақ локомотив паркінің орташа жасы 30 жылдан 21 жылға дейін қысқарған.
Көлік министрлігінің мәліметінше, теміржол инфрақұрылымын жаңарту және техникалық паркті кезең-кезеңімен жаңғырту жұмыстары алдағы уақытта да жалғасады. Бұл шаралар тасымалдау көлемінің өсуіне және экономиканың ұзақ мерзімді дамуына қажетті негіз қалыптастыруға бағытталған.