Тараз қаласында темір жол үстінен өтетін көпір құрылысы жүріп жатыр
"Қазақстан теміржолшысы" газетінің Жамбыл облысындағы меншікті тілшісі
Қаланың Жібек жолы мен Әулиеата аудандарының арасын жалғайтын көпір 2027 жылы аяқталып, пайдалануға беріледі.
Қазір құрылыс алаңында көпірдің тірек қабырғалары салынып, инженерлік желілердің орны ауыстырылуда. Ұзындығы 945 метр болатын 4 жолақты көпірмен қатар, жаңа жаяу жүргіншілер өткелі де салынбақ.
– Жобаны қаржыландыруға республикалық бюджеттен 16,9 миллиард теңге қарастырылған. Ал көпір құрылысына қажетті жер телімдерін мемлекет меншігіне қайтаруға 1,8 миллиард теңге бөлінді. Тек құрылыс-монтаж жұмыстарына 1 миллиард теңге қаржы жұмсалды. Жоспар бойынша 2027 жылдың бірінші жартыжылдығында аяқтау көзделген. Бірақ мердігер компанияның басшысы нысанның қазығы қағылған кезде, өткелді 2026 жылдың соңына дейін пайдалануға береміз деп уәде еткен. Бүгінгі таңда құрылыс бекітілген кестеге сай жүріп жатыр, – дейді Тараз қаласының әкімі Бақытжан Орынбеков.
Ал аспалы өткелдің құрылысы биыл аяқталады. Тапсырыс беруші тараптың айтуынша, жаяу жүргіншілер көпірінде мүмкіндігі шектеулі жандар үшін арнайы лифт орнатылмақшы. Жалпы мұндай аспалы көпір Тараз вокзалы маңында да бар. Ал темір жол үсті өткелі Абай даңғылының бойында салынып жатыр. Бұл вокзалға жақын аумақта. Тұрғындар қаланың «Элеватор» аталып кеткен аймағына да аспалы көпір салынса дейді.
Осы маңда тұратын темір жолдың арғы және бергі бетіндегі халық тыйым салынғанына қарамастан, Тараз станциясының қызметтік өткелін кесіп өтеді. Қолданыстағы аспалы көпірге дейін біраз жер, жұмысқа жаяу қатынайтындар уақыттан ұтылғысы келмейді. Асығып жүріп қауіпсіздікті ұмытады. Сондықтан жоспарланған жаяу жүргіншілердің аспалы көпірі осы маңнан салынса, оң шешім болар еді.