Соқпағы көп Жаңатас станциясындағы жолды күтудің қыры мен сыры
Жамбыл жол дистанциясының Жаңатас станциясындағы өндірістік телімі қиын да күрделі учаске саналады. Тау ішінен тартылатын қос рельстен жүк тасымалы қай кезде де толастаған емес. Әсіресе, «Қазфосфат» ЖШС өндірген фосфор рудалары күн демей, түн демей ағылып жатады. Соңғы жылдары оған «ЕвроХимнің» жүк вагондары қосылды. Сондықтан пойыздардың қауіпсіз жүрісін қамтамасыз ететін жолшы- лардың жұмысы жылдың төрт мезгілінде де қызу жүріп жатады. Жаңатас теліміндегі 5-ші бригаданың жетекшісі Дүйсен Түсіпов осы салада 36 жылдан бері еңбек етіп келеді.
«Біздің жұмыс ешқашан біткен емес, жазда жол жөндеу, қыста қар күреу, жолдарды ашу. Жаңатастың табиғаты қатал, қарлы бораны көпке аян. Жолдарды жауып тастайды. Ондай кезде бригада-бригада болып, қар күреуге жұмыламыз. Әсіресе, Қаратау сілемдерінің арасымен өтетін теміржолдардан пойыздар кедергісіз өту үшін көп жұмсаймыз. Ал күн жылына жол жөндеу жұмыстарынан бөлек, жолды жауып қалатын шөп жұлу науқаны басталады», – дейді Дүйсен Күзенбайұлы.
Қазіргі таңда бұл бригадада төрт жолшы еңбек етеді. Олар Қали Тынымбаев, Талғат Кенбаев, Сәбит Өмірәлиев, Қанат Әбусабыров. Қай-қайсы да өз істерінің кәсіби мамандары саналады. Жолшылар бригадасы күнделікті рельстерді арнайы шаблонмен тексереді. Босап қалған тұстарын кілттерімен тартып, қайта қағады. Кеңейіп кеткен жері болса, оны қайта түзеп, бірдейлігіне назар аударады. «Қазақстан темір жолы» компаниясының құрамында жұмыс істеу қазіргідей дағдарыс кезеңінде бізге үлкен демеу, қамқорлығын үнемі сезінеміз. Айлық жалақымыздан бөлек, кәсіподақтың тарапынан әлеуметтік пакеттер, материалдық көмектер ұсынылып тұрады. Тіпті, отбасылық қуаныштарымызда, қиындықтарымызда бастауыш кәсіподақ ұйымының жәрдеміне арқа сүйейміз», – деп өз ойымен бөлісті Қанат Әбусабыров. Дәл қазіргі кезде бригада Жаңатас станциясының аумағындағы жолдарды ағымдағы жөндеуден өткізуде екен. – Жолдағы жарамсыз шпалдарды ауыстырып жатырмыз. Соңғы кезде жолдарға бетон шпалдар қойылып жатыр, күндердің күнінде бізге де жетер. Қазірше жолдарда ағаш шпалдар, оны ауыстыру бізге оңай. Өйткені, 70-80 килограмм ғана салмағы. Ал бетон шпалдар 250 килограмм тартады. Алайда, қазіргі заманауи технологиялар көп жұмысты жеңілдетіп берді ғой. Рельстерді тартатын болсақ та, шебіндерді төсеп, тегістейтін болсақ та, арнайы қондырғыларды алдырамыз. Олар жұмыстың сапасын да арттырып, жедел бітуіне де септеседі. Ілгеріде барлығын 10-15 жолшы жүріп қолмен, қарапайым техникалармен атқаратын едік, – дейді Дүйсен Түсіпов. Жаңатастық жолшылардың бір күнгі жұ- мысына куә болып, қыс болса желдің өтінде, қардың астында, жаз болса күннің ыстығына қақталып шаруаларын шатқаяқтатпай жүрген жолшылардың әр күнгі жұмысы ерлікпен пара-пар екеніне көз жеткіздік. «Арагідік Түркісіб, Ақшолақ, Малдыбай станцияларының телімдеріне де жұмыс сапарымен барып, жөндеу жұмыстарына атсалысамыз. Бәріміздің илегеніміз бір терінің пұшпағы болғасын бір бірімізге көмек қолын созып, жолшылар абыройы үшін аянбақ емеспіз», – деген Дүйсен Күзембайұлының сөзінен кейін сары күртеше киген жолшылар жұмысына сәттілік тілеп, Жаңатастан аттанып кеттік.