Темір жолда қозғалыс қауіпсіздігінің бұзылуы 10%-ға азайды
Алматыда теміржол көлігіндегі қауіпсіздік және цифрландыру бойынша екінші Еуразиялық Форум өтті. Іс-шараға ҚР ИИДМ, ТМД елдері теміржол әкімшіліктерінің өкілдері, көлік қауіпсіздігін қамтамасыз етудің инженерлік-техникалық жүйелерін өндірушілер, конструкторлық бюролар, ғылыми-зерттеу ұйымдары қатысты. Форум тәжірибе алмасу үшін үлкен және тиімді алаңға айналды, деп хабарлайды Rail-news.kz.
Форумға «РЖД» ААҚ бас директоры – Басқарма төрағасы Олег Белозеровтың құттықтауы келіп түсті. Олег Белозеров өзінің жеделхатында бүгінде тасымалдаудың сенімділігін қамтамасыз етудің жаңа, стандартты емес тәсілдерін табу қажет екенін атап өтті. Қашықтықтан диагностикалау және түпкілікті бақылау, компьютерлік модельдеу және пилотсыз басқару әдістері үлкен әлеуетке ие.
Өзінің құттықтау сөзінде «РЖД» ААҚ бас директорының орынбасары – қозғалыс қауіпсіздігі департаментінің бастығы Шевкет Шайдуллин және «Теміржол техникасын өндірушілер бірлестігі» қауымдастығының президенті Валентин Гапанович темір жолдағы қозғалыс қауіпсіздігін қамтамасыз ету мәселелерінде қазақстандық әріптестерімен үйлесімді жұмысты атап өтті. Сарапшылар әр процестің иесі өзінің тәуекелдерін анықтап, бағалауы керек, содан кейін оларды азайту үшін шаралар қабылдауы керек дегенді айтты. Пойыздар қозғалысы қауіпсіздігін қамтамасыз етуде бірыңғай тәсіл болуға тиіс.
«ҚТЖ» ҰК» АҚ Басқарма төрағасының орынбасары Қанат Әлмағамбетов инфрақұрылымды дамытумен, жылжымалы құрам санын ұлғайтумен және жүк ағынын арттырумен қатар, Ұлттық компания үшін тасымалдау процесінің қауіпсіздігін қамтамасыз ету басымдықты міндет болып табылатынын атап өтті. ҚТЖ бұзушылықтардың алдын алу бойынша мақсатты жұмыс жүргізуде. Ағымдағы жылдың 9 айында өткен жылдың сәйкес кезеңімен салыстырғанда теміржолдағы қозғалыс қауіпсіздігін бұзу саны 10%-ке төмендеді. Әрбір үшінші бұзушылық бөгде адамдарды, қараусыз қалған малдарды басумен, теміржол өткелдеріндегі жол-көлік оқиғаларымен байланысты.
«ҚТЖ» ҰК» АҚ Қозғалыс қауіпсіздігі жөніндегі директоры Марат Шәкенов атап өткендей, адами фактордың қозғалыс қауіпсіздігіне әсерін азайту үшін 2022 және 2023 жылдар «Қозғалыс қауіпсіздігі мәдениетін Дамыту жылдары» деп жарияланды. Негізгі назар пойыздар қозғалысы қауіпсіздігін қамтамасыз етуге байланысты қызметкерлердің біліктілігін арттыруға және психологиялық даярлығына аударылады. Бұқаралық кәсіптердің 9 мыңнан астам қызметкері оқудан өтті. Персоналды ынталандыру жүйесі енгізіліп, еңбек жағдайлары жақсаруда. Қозғалыс қауіпсіздігін бұзудың алдын алғаны үшін 500-ден астам адамға сыйақы берілді.
Теміржол қызметтері мен желілік кәсіпорындардың кемшіліктерді жою бойынша қабылданып жатқан шараларын бақылау және ақпарат жинау процесін автоматтандыру бойынша жұмыс жалғасуда. Сонымен, «Машинистің ескертпелер кітабы», «Станцияны комиссиялық айлық тексеру», «Тежегіш башмактарды есепке алу және сақтау», «Техникалық құралдардың істен шығуын есепке алу және тексеру» автоматтандырылады. «Цифрлық Қазақстан» және «Цифрлық трансформация» бағдарламалары шеңберінде магистральдық желіде жұмыс істеудің заманауи әдістері енгізілуде.
Форум барысында «Вагондар және вагон шаруашылығы», «Көлік-логистика және коммуникация саласы үшін кадрлар даярлау тұжырымдамасы» тақырыбында пікірталас сессиялары өткізілді. «Теміржол көлігіндегі қауіпсіздікті қамтамасыз ету», «Көлік жүйесін жаңғырту және теміржол саласын цифрлық трансформациялау» панельдік отырыстары қызығушылық тудырды.