Нәзік жандар ұжымы
Ақтөбе облысы бойынша меншікті тілші
Мереке қарсаңында кіл қыз-келіншектерден құралған ұжымның есігін қақтық. Темір-терсектің ортасында жүрсе де нәзіктігін жоғалтпаған асыл жандар вокзал шаруашылығын ұршықша иіріп отыр.
Шалқар темір жол вокзалы – теміржолшылар қалашығының қақпасы іспеттес. Бірі келіп, бірі кетіп жатқан нөпір халықтың жағдайын жасап, қауіпсіздігін қадағалап, тазалық пен тәртіпті реттеп отырған ұжымның жұмысымен таныстық.
Сонау 1904 жылы іргетасы қаланған тарихи ғимарат әлі күнге сыр бермеген.
«Біз ең алдымен вокзалда тазалық пен тәртіптің болуын қатаң қадағалаймыз. Жолаушыларға қызмет көрсететін қызметкерлеріміздің киім киісі, жүріс-тұрысы, жұртшылықпен қарым-қатынасы түзу болуы тиіс», – деді бізбен әңгімесін бастаған вокзал бастығының кезекші көмекшісі Жанат Махамбетова.
Шалқар вокзалы тәулігіне 300-ге жуық адамға қызмет көрсетіп, 15 жұп пойызды қабылдап-жөнелтеді. Вокзал кассасынан күніне 200-300 адам билет алады. Жолаушыларға қызмет көрсететін 20-дан аса қызметкері бар. Олар: вокзал кезекшілері, анықтама бюросының мамандары, дикторлар, кассирлер. Басым көпшілігі – ұзақ жылдан бері осы жерде жұмыс істеп келе жатқан мамандар.
Вокзал бастығының кезекші көмекшілері Жанат Махамбетова мен Әсел Сембаева жасалып жатқан жұмыспен таныстырып шықты. Қыздарға ілесіп, вокзал аумағын шарлап шықтық. Пойыздардың келіп-кету уақыты жөнінде ақпарат беретін таблосынан бөлек, радио хабарлағышпен тұрақты ақпарат таратылып отырады. Анықтама бюросы жұмыс істеп тұр. Жолаушыларға арналған күту залы тап-тұйнақтай. Айтуларынша, жолаушылар көбіне пойыздарға қатысты ақпарат, мүмкіндігі шектеулі азаматтарға қатысты жеңілдіктер сұрайды. Билеттерді кері қайтару, рәсімдеу туралы мәліметтерді береді. Мүгедектердің жүріп тұруына да ыңғайлылық жасалған.
«Қыстың күні жұмыс көбейеді, жолаушылар пойызға мініп түскенде тайып құламау үшін перронды қар мен мұздан тазалаймыз, ғимараттың жылы болуын қадағалаймыз. Алты ай сайын еңбек қауіпсіздігі және өрт қауіпсіздігіне тест тапсырамыз», – дейді вокзал бастығының кезекші көмекшісі Әсел Сембаева.
Әйелдер патшалығынан көтеріңкі көңіл күймен аттандық.
