Жат діни бағыттағы теміржолшы жауапқа тартылды
Ақтөбе облысы бойынша меншікті тілші
Ақтөбе станциясында дәстүрлі емес діни бағыттағы аудиодәрісті сақтаған адам жауапқа тартылды.
Күдікті жағдай әлеуметтік желіге мониторинг жүргізу барысында анықталған. Ақтөбе станциясындағы желілік полиция бөлімінің экстремизмге қарсы іс-қимыл жөніндегі қызметкерлері теміржолшыны жауапқа тартты. Ол Қазақстанда тыйым салынған дәстүрлі емес, діни бағыт идеяларын насихаттайтын аудиодәрістерді сақтаған.
«Тексеру барысында 29 жастағы ер адамның теміржол мекемелерінің бірінде жүк тиеуші болып жұмыс істейтіні анықталды. Дінтану сараптамасының нәтижесі бойынша жоғарыда аталған аудиоматериалдар Қазақстан Республикасының аумағында пайдалану, сақтау және тарату үшін ұсынылмайды», – дейді Көліктегі полиция департаменті экстремизмге қарсы іс-қимыл басқармасының бастығы Ерлан Әлімов.
Айтуынша, ер адамға қатысты ӘҚБтК-нің 453-бабы 1-бөлігі бойынша хаттама толтырылып, іс Ақтөбе қаласының Әкімшілік құқық бұзушылықтар жөніндегі мамандандырылған ауданаралық сотына жолданды. Ал сот шешімімен жоғарыда аталған азаматқа 20 АЕК (69 000 теңге) мөлшерінде әкімшілік айыппұл салынды.
Биылғы жылдың 1 тоқсанында көлік полицейлері діни қызмет саласындағы әкімшілік құқық бұзушылықтардың 4 фактісін анықтаған, оның үшеуі теміржол көлігі қызметкерлерінің әлеуметтік желілердегі діни мазмұндағы материалдарды сақтағаны үшін, ал біреуі діни әдебиеттерді заңсыз әкелгені үшін жауапқа тартылған.