Достастық теміржолшылары жүк вагондарына қойылатын бірыңғай талаптарды талқылады
«Қазақстан теміржолшысы» газетінің тілшісі
Астана қаласында үш күнді қамтыған Достастыққа қатысушы мемлекеттер теміржол көлігі жөніндегі кеңесі Вагон шаруашылығы комиссиясының 77-ші отырысы өтті. Іс-шараның соңғы күнінде отырыс хаттамасына қол қойылды.
Қазақстан, Ресей, Беларусь, Әзірбайжан, Қырғызстан, Ресей, Тәжікстан, Өзбекстан, Грузия, Эстония, Латвия мемлекеттерінің, ал Армения мен Түрікменстан елдерінің (онлайн режимінде) теміржол әкімшіліктері вагон шаруашылығы комиссиясының мүшелері, ТМД теміржол көлігі кеңесі дирекциясының өкілдері, ғылыми-зерттеу ұйымдары, вагон жасау және вагон жөндеу кәсіпорындары, жылжымалы құрам иелері және теміржол көлігі операторлары қатысқан кеңейтілген отырыста жүк вагондарын жасау, жөндеу және техникалық қызмет көрсету, сондай-ақ 1520 кеңістігінде жұмыс істеудің ортақ принциптері талқыланды.
– Күн тәртібінде вагондарды жөндеуге, жылжымалы құрам арбаларының жұмысын жақсартуға қатысты негізгі бағыттар бойынша 50 астам тармақ қаралды. Олар – пойыздардың қозғалыс қауіпсіздігін бұзуға әкелетін ең маңызды элемент. Жөндеу технологиясына да бірнеше өзгерістер енгізіледі. Вагондардың серіппелі рессорлы жинақтарының жұмысы, ашық вагондардың люктері бойынша келесі кеңестерде дұрыс шешім қабылдау үшін біз бірқатар ғылыми зерттеулерді анықтадық. Қазіргі уақытта біз вагондарды жаңғырту туралы шешім қабылдадық, бұл рефрижераторлы термиялық, сұйытылған газдарды тасымалдауға арналған жылжымалы құрамдар сияқты вагондарды ұзақ мерзімге пайдалануға мүмкіндік береді. Тораптар жаңғыртылатын болады, бұл оларды белгіленген мерзімнен кейін пайдалануға мүмкіндік береді, – деп атап өтті Комиссия төрағасы Роман Хойхин.
Осылайша, Вагон шаруашылығының комиссиясы жүк вагондарына техникалық қызмет көрсету және жөндеу бойынша құжаттаманы жаңартты. Атап айтқанда, «Жүк вагондарының модельдері», «Жүк вагондарының пайдалану мерзімін ұзарту үшін күрделі жөндеу жүргізудің техникалық шарттары» және тағы басқа анықтамалықтар. Сондай-ақ тежегіш жабдықтарға техникалық қызмет көрсету және жылжымалы құрамның тежегіштерін басқару қағидаларына өзгерістер енгізілді.
Сонымен қатар кездесуде Достастық темір жолдары әкімшіліктерін халықаралық жүк тасымалдарын ұйымдастыру және жүк вагондары паркін бірлесіп пайдалану бойынша үйлестірудің жалпы мәселелері қаралды.
2024 жылғы 1 қаңтардағы жағдай бойынша Достастық елдері жүк вагондарының жалпы паркі 1,7 миллионнан астам бірлікті құрайды, оның ішінде Ресей иелігінде 1,3 млн астам вагон болса, 130 мыңнан астамы Қазақстанға, қалған 45 мыңнан астамы Беларусь және басқа елдерге тиесілі.