Теміржол тарихына саяхат
«Қазақстан теміржолшысы» газетінің тілшісі
Жұмысшы мамандықтар жылы аясында Астана қаласы Сарыарқа ауданының оқушылары үшін «Қазақстан темір жолы» компаниясының музейіне арнайы экскурсия ұйымдастырылды.
Бұл күні балалар теміржол саласының қалыптасу тарихымен танысып, сала мамандарының ел дамуына қосқан үлесі жөнінде мол мағлұмат алды. Сонымен қатар сирек кездесетін экспонаттарды, пойыз макеттері мен әр кезеңдегі теміржолшылардың қызметтік киім үлгілерін тамашалады.
Теміржол саласының маңызды мамандықтары – машинист, кезекші, жолшылар және басқа да мамандарға қатысты экспонаттар мен құжаттар балалардың қызығушылығын тудырды. Бұл мамандықтардың теміржол жұмысындағы ролі мен маңызы туралы әңгімені қызыға тыңдады.
Музейдің меңгерушісі Ақмарал Молдашеваның айтуынша, мұнда елорданың оқу орындарынан келетін жастар көп. Оларды Қазақстанның теміржол тарихы қызықтырып, әрі ҚТЖ-ның ғимаратын аралап көргісі де келеді. Себебі компанияның кіреберістегі фойесінде қазақтың түркі заманынан бергі тарихын көрсететін ежелгі карталары ілінген. Бұл карталар Қазақстан бойынша тек бірнеше жерде ғана бар. Ал аталған музейде 1000-ға жуық экспонаттар мен құнды материалдар, фотодеректер қойылған. Олардың қатары болат жолға қатысты кітаптар, басқа да материалдармен үнемі толығып отырады. Сондықтан теміржол музейін көпке таныстыру үшін осындай экскурсиялар жиі ұйымдастырылып тұрады.