ҚТЖ мен ҚХР Елшілігі теміржол көлігі саласындағы екіжақты ынтымақтастықтың негізгі мәселелерін талқылады
«Қазақстан темір жолы» ҰК» АҚ-да Басқарма төрағасы Талғат Алдыбергеновтың Қытай Халық Республикасының Қазақстан Республикасындағы Төтенше және Өкілетті Елшісі Хань Чунлинмен кездесуі болып өтті, деп хабарлайды Rail-news.kz.
Тараптар Қазақстан мен Қытай арасындағы көліктік-логистикалық ынтымақтастықты дамытуға қатысты көптеген мәселелерді талқылады. Теміржол тасымалының көлемін ұлғайту, шекаралық өткелдердегі кедергілерді жою, сондай-ақ екі елдің түйіскен жеріндегі іс-қимылдарды үйлестіру мен синхрондауды күшейту басты назарда.
Мына мәселелерге екше назар аударылды:
- жүктерді екіжақты тасымалдау көлемін ұлғайту;
- шекарада пойыздардың тоқтап қалуын қысқарту;
- Қазақстаннан Қытайға астық жүктерін қабылдау рәсімдерін оңайлату;
- инфрақұрылымды дамыту және Алашаңқай – Достық аралығындағы екінші жолдардың құрылысын іске қосу;
- жүктер номенклатурасын қоса алғанда, Бақты-Таченнің жаңа желісін талқылау.
Тараптар көлік саласындағы стратегиялық әріптестікті нығайтуға ұмтылысын растады және бірлескен күш-жігер екі ел арасында тұрақты, тиімді және өзара табысты көлік дәлізін құруға мүмкіндік беретініне сенім білдірді.
Бүгінде Қазақстан Шығыс пен Батыс арасындағы сенімді құрлық көпірі болып табылатыны, бұл Қытайдың Еуропа, Таяу Шығыс және Каспий өңірі нарықтарына орнықты қолжетімділігін қамтамасыз ететіндігі атап өтілді. Темір жолдардың бірлескен күш-жігері арқасында 2025 жылы тасымалдау көлемі 11% өсіп, 35,6 млн тоннаға жетті.
Сондай-ақ, Тараптар ТХКБ-ның дамуына ерекше мән беретіні атап өтілді. 2025 жылы ТХКБ бойынша контейнерлік транзиттің динамикасы 36 мың ЖФБ құрап, 15% өсім көрсетті.