Көмір жеткізу кестеге сай

Жаңалықтар

16.02.2018, 18:28

Жуырда ҚР энергетика вице-министрі Бақытжан Жақсалиевтің Семейге келген сапарында Қаражыра көмір кен орнында көшпелі кеңес болды. Оған облыс басшылығымен қатар «Қаражыра» АҚ жетекшілері, «Балапан көлігі» ЖШС мен қатты отын тасымалымен айналысатын басқа да компания өкілдері қатысты. Кездесу барысында сөз болған ең өзекті мәселе – көмір тасымалы, энергетикалық объектілерге отын жеткізу, т.т. болды. Бүгінде елімізде 10 ірі көмір қазатын кәсіпорын жұмыс атқарады. Соның бірі «Қаражыра» АҚ кен орнының қоры 1 миллиард тонна көмірді құрайды, ол өз кезегінде бүкіл республиканы үздіксіз қамтамасыз етуге мүмкіндік береді екен. «Қаражыра» АҚ 23 жыл ішінде 100 млн тоннадан аса отын өндірген, карьер разрезінде өндіріс көрсеткіштері жыл сайын артуда. Сәйкесінше, көмір тасымалы да жыл санап артып отыр. Басты әріптес «ҚТЖ» ҰК» АҚ болып отыр. Мәселен, алдыңғы жылы 5,9 млн тонна өндіріліп, тасымалданса, өткен 2017 жылы бұл көрсеткіш 6,8 млн тоннаға жетті. Оның басым бөлігі Семей ЖТ бөлімшесіне тән. Осының арқасында ҚР электр станциялары, қазандықтар және коммуналдық-тұрмыстық объектілерге көмірді тиеп жөнелтуде кедергілер болған жоқ. Осылайша, өткен жылы жылу көздеріне 2 млн 600 мың тонна, өнеркәсіптік кәсіпорындарға – 800 мың тонна, коммуналдық-тұрмыстық секторға 2 млн 600мың тонна көмір жеткізілген. ҚР энергетика вице-министрі Бақытжан Жақсылықов атап өткендей, разрездегі көмір өндірісі жемісті жүргізіліп жатыр. Жергілікті Қаражыра көмір кенішімен басты әріптес «ҚТЖ» ҰК» АҚ-мен арадағы келісім аясында қысқы отын тасымалы жыл санап артып келеді. Бір мысал, өткен жылы көмір тиеу 1 233,3 мың тоннаға жеткен. Бұл көрсеткіш – соңғы жылдары орын алмаған жайт. Тасымал көлемінің бұлайша ұлғаюына бір есептен тапсырыс берушілер қатарының артуы да себеп. Сондай-ақ, байырғы клиенттер Защита мен Жаңа-Өскемен, «РК-1» сынды бірқатар алпауыт жылу электр орталықтарының сұранысы да еселеп артқан. Қазіргі күні ел шығысындағы жылу электр станцияларына қатты отынды Семей ЖТ бөлімшесінің теміржолшылары уақытында жеткізіп отыр.

Көмір жеткізу кестеге сай

Басқа да жаңалықтар

Қазақстан теміржолшысы газеті, №51 04 шілде 2025 жыл