Байланыс белгілері талапқа сай

Жаңалықтар

20.02.2018, 12:14

Шымкент белгі беру және байланыс дистанциясындағы техникалық құжаттама бөлімі байланыс белгілерінің сызбалық нұсқасын ұдайы жаңартып тұрады. Оған негізгі магистральдан бөлек, әр айналым жолы мен бекеттердегі сызбалық нұсқалар да кіреді. Сызбаны жаңарту техникалық шешімге және келген телеграммаға сай реттелмек. Кейінгі кезде перегондағы бағдаршамдардың дені жарықдиодты заманауи түріне ауысты.Техникалық құжаттама бөлімінің бастығы Бекжан Билібаевтың айтуынша,бұл механиктердің жұмысын біршама жеңілдеткен. Ескі жүйеде бағдаршамдар алыстан анық көрінбесе керек. Қанша рет тоқ жүйесін реттеп, уақытылы баптаса да машинистер тарапынан осыған наразылық туатын. Қазіргісінің жарығы тұман басып, қар жауса, 1000 метрдей тегіс жолда анық көрінетіндіктен, ешқандай шағым жоқ. Рельс тізбектерінің қорғаныс құралдары да заманауи түріне көшкен. – Жолдағыдан бөлек, электровоздың ішінде қосымша бағдаршам болады.Оны біздің релелер қуаттандырады. Бүгінде байланыс саласындағы қажетті техникалық құрылғылар тұтастай болмаса да, ішінара соңғы түріне алмастырылуда. Біз жұмыстың жеңілдегенінен бұрын қауіпсіздіктің сақталатынына қуанамыз. Өйткені, жұмыс ауыр немесе жеңіл болсын, ескінің аты ескі. Апат орын алмаса деп алаңдап отырасың. Бағдаршамдағы үш түсті реттеп тұратын, әрқайсысының өз кодтары қойылған КПТШ сызбасы да жаңаланды. Шымкент – Түлкібас аралығындағы басты жолдардың бәріне бұрынғыСП-6 электр жетегінің орнына қойылған Альстом қызмет көрсетеді. Альстомға ауыстыру үшін Р65 типті рельстер, темір-бетонды шпалдар болуы керек. Біздің телім түгелге дерлік темір бетонға көшкен. Ленгер бағытына кететін Қазығұрт станциясында 50 пайыз Альстомға көшіп, жолдар темір бетонға айналды. Италиялықтар шығарған бұл электр жетегін бір құрған соң, оның үздіксіз жұмыс істеуі 20 жылға жетеді делінген. Ал пайдасына келсек, механиктер тек жауын-шашынды күндері, қар жауғанда тазалап, тексереді. Моторын ауыстырмайды. Бұрынғы СП-6 жетегінің моторын әр 3-5 жылда ауыстыратын. Жинап алып, моторды реттеген соң қайтадан апарып орналастыратын. Альстомның моторы жетектің ішіне кіріктірілгендіктен алынбайды. Дегенмен, Альстом мүлдем бұзылмас үшін жолдағы талаптардың бәрі соған сай болғаны дұрыс. Мәселен, шпалдар темір-бетонды, бұрмалары да заманауи дегендей. Әр айналым жолының арнайы кітапшасы бар. Біздің бөлімдегі қыздар келген телеграммалық өзгерістерді бұрынғы сызбаға енгізеді. Алдымен монтажын жасайды. Жігіттер күрделі жұмыстарды үнемі телім бойында жүріп ретке келтіреді, - дейді техникалық құжаттама бөлімінің бастығы. Өткен жылы Манкент – Түлкібас, Көктерек –Түлкібас, Меңлібай – Көктерек перегонында түрлі-түсті бағдаршамдардың сызбалары қайта жасалыпты. Бұл жұмыс жыл соңына дейін өзге перегондарда қайталанған. Арнайы тапсырма келіп, материалдық жағынан қамтамасыз етпесе де, сызбаларды дистанциялықтар өз күштерімен жаңалап тұрады екен. Аппараттың бәрі автоматты түрде осы сызбалардың арқасында ашылып-жабылып, жұмыс істеп тұр. Қауіпсіздік үшін алаңдайтын байланысшылар мүмкіндігінше ескіні жаңалап, жаңаны күтіп ұстауға бейім.

Байланыс белгілері талапқа сай

Басқа да жаңалықтар

Қазақстан теміржолшысы газеті, №51 04 шілде 2025 жыл