Төніп тұрған қауіп жоқ

Жаңалықтар

23.02.2018, 11:44

Оңтүстікте биыл жауын-шашын аз, қар аз жауды. Есесіне суық жел жиі соғып тұр. Содан болар кешегі апта бір тәулік жаңбыр жауса да, жердің тоңы қатып қалғандықтан су жерге сіңбей, Бәйдібек, Созақ аудандарының төменгі елді мекендерін ішінара су басты. Дегенмен, теміржол бойында ондай қауіп жоқ көрінеді. Арыс, Шымкент, Түлкібас жол дистанциялары жылдағыдай дайындық шараларын жүргізуде. Шымкент жол дистанциясы бойынша Бадам, Тоғыс су бөгеттері мен Манкент станциясындағы Ақсу өзенінің су деңгейі талапқа сай. Түлкібас пен Арыстың екі ортасындағы 88 көпір мен 22 құбыр жиі тазаланып тұр. Арыс жол дистанциясының инженері Болатбек Салмұрзаевтың айтуынша, жылда екі вагон қиыршық тас, үш платформа темір-бетон шпал, тағы қосымша цемент дайындалады екен. Биыл барлық заттар жиналып тұр, әне-міне вагонға тиелмек. Өйткені, жылда Арыс – Түркістан бағытындағы Шошқакөлге жақын жердегі Күншағыр – Отырабат телімінің 3124,3126, 3129-шақырымдарында су басу қаупі орын алған. Арыс өзені өтетін Қостүйін көпірінде су деңгейі қалыпты. – Жамбылға дейінгі аралықта су өткізетін 272 құбыр мен 89 көпірдің тазалығы назарда тұр. Таудың қары тұтас еріп, жаңбыр жауса Күркіреусу – Сұрым аралығында Теріс-Ащыбұлақ су бөгетінен қауіп болуы мүмкін. Өткен жылы осындай уақытта Түлкібас станциясында – 7, Боранды бекетінде 13 вагон платформа жасақталған. Аксу-Жабағылы тауының етегіндегі Боранды, Абайыл, Шақпақ бекеттеріне қар көп түсетіндіктен, су тасқынының алдын алатын керекті заттарды жыл сайын Борандыда дайындаймыз. Төніп тұрған қауіп жоқ болса да биыл да арнайы вагон жасақталуда, - дейді Түлкібас жол дистанциясындағы өндірістік-техникалық бөлімінің бастығы Ғазиза Сүлейменова.

Төніп тұрған қауіп жоқ

Басқа да жаңалықтар

«Қазақстан теміржолшысы» газетінің 2025 жылғы 8 мамырдағы арнайы саны