Өткел жөндеуді қажет етеді

Жаңалықтар

28.03.2018, 16:59

Атырау жол дистанциясы бойынша Исатай ауданы аумағында 14 теміржол өткелі бар. Олардың ішінде 13 өткел күзетілмейтін, тек біреуі ғана күзетіледі. Біздің сөз еткелі отырғанымыз да осы күзетілетін өткел жөнінде. Атырау-Бақсай жол телімінің 255-шақырымында, Чапаев пен Аққыстау селосы аралығында орналасқан аталған теміржол өткелі республикалық Атырау-Астрахань автожолын қиып өтеді. Күніне ол көлік жолы арқылы жергілікті және мемлекетаралық жүздеген жеңіл және жүк көліктері, ал теміржол арқылы тәулігіне 18-20 пойыз өтеді. Әңгіме осы өткел теміржолын жөндеу жөнінде болып отыр. Соңғы уақытта қай өңірде де автокөлік пен пойыздардың соқтығысып қалу оқиғалары көбейіп кетті. Осындай келеңсіздіктің алдын алу – жол қауіпсіздігі және адам өмірі үшін де маңызды мәселе. Соған сәйкес, өткелге бейнебақылау қондырғысы орнатылыпты. Атырау жол дистанциясының өндірістік-техникалық бөлім басшысы Санат Нұғымановтың айтуынша, аталған теміржол өткелі бүгінгі күнде жөндеуді қажет етеді. Рельс ақауын 2 жылдан бері ауыстыруға мүмкіндік болмай келеді. Өйткені, құзырлы органдар – жергілікті әкімдік, жол полициясы тарапынан осы мәселеге жеткілікті көңіл бөлінбеуде. Жолды жөндеуге өтініш білдіріліп, ресми хат жолданғанымен, тұшымды жауап жоқ. Жол басқармасы «Қазавтодор» мекемесіне сілтейді, соңғысы 17 км жолды түгел жөндеуді талап етеді-мыс. Тек ақаулы рельстерді ауыстыру жеткілікті кезде оның не қажеті бар... Сайып келгенде, мәселе сиырқұйымшақтанып, тұйыққа тіреледі. Жол дистанциясы қызметкерлері 2-3 сағаттық «толаскез» алып, жолды жөндегісі келгенімен, республикалық мәндегі автожолды аз уақытқа өздігінен жауып тастауға құзыреті жүрмейді. Рұқсат керек. Бұл жөнінде Исатай аудандық әкімшілігіне хабарласқанымызда, жауапты маман Еркебұлан Жоланұлы одан хабарсыз екендігін айтып ақталды. Құзырлы органдар осылайша селқостық танытып жүргенде қауіпсіздікке төнген қауіп қалыңдап кетуі ғажап емес. Оның артында жолаушылар тағдыры мен теміржол арқылы тасымалданатын мыңдаған тонна жүк, материалдық және экономикалық шығындар тұр. Құдай сақтасын, әрине, бірақ алда-жалда апатты жағдай бола қалса, обалы кімге? Өткелдегі 25 метр теміржолды ауыстырып, жаңартуды әрлі-берлі сілтеп, сонша ұзартудың не қажеті бар?

Өткел жөндеуді қажет етеді

Басқа да жаңалықтар

Қазақстан теміржолшысы газеті, №10 10 ақпан 2026 жыл