Ақтауда «Каспий порттары және кеме қозғалысы-2019» көрмесі өтті

Ақтауда 13-15 мамыр аралығында «Каспий порттары және кеме қозғалысы-2019» атты бірінші халықаралық көрме және конференция өтті.

Шараға халықаралық деңгейдегі 30-дан астам шетелдік көлік және логистика компанияларының өкілдері мен 40-тан астам сарапшылар қатысып, Каспий теңізі аймағының көліктік инфрақұрылымын пайдалану арқылы аймақтық экономика мен сауда-саттықты дамытудың жаһандық тенденциясын талқылады.

Қазақстан темір жолы компаниясынан «ҚТЖ» ҰК» АҚ басқарма төрағасының логистика жөніндегі орынбасары Павел Соколов, «Ақтау халықаралық теңіз сауда порты» ҰК» АҚ президенті Абай Түрікпенбаев, тағы бірқатар жауапты тұлғалар қатысып, ұлттық компания мүмкіндіктерін паш етті.

Көлік және логистика саласындағы озық тәжірибелермен алмасу, тасымалдау процесінің барлық қатысушыларымен тұрақты байланыс орнату мақсатында ұйымдастырылған конференция Ақтау қаласындағы «Caspian Rivera» қонақ үйінде өткізіліп, көрмеде 300-ден астам теміржол, теңіз, көлік және логистика компаниялары, өңірдегі жетекші жүк жөнелтушілер, порт жабдықтары және қызмет көрсету мекемелерінің өкілдері өнімдерін ұсынып, мүмкіндіктерін таныстырды.

Конференцияда «Әлем нарығы мен халықаралық логистика. Азия және Еуропа арасындағы сауда жолдарын дамыту және жетілдіру» тақырыбы бойынша өткен сессияда «ҚТЖ» ҰК» АҚ басқарма төрағасының логистика жөніндегі орынбасары Павел Соколов сөз сөйледі. Ол ұлттық компания ұсынып отырған көліктік-логистикалық қызмет түрлері, транзиттік контейнерлік тасымалдардың көлемі жайлы кеңінен мәлімет берді.

«Бүгінгі таңдағы біздің жұмысымыз Қазақстан арқылы қосымша жүктерді тартуға бағытталып отыр. Жүк айналымы көлемінің 13 пайызын транзиттік тасымалдар құрайды. Біз Қытайдан Еуропаға және кері бағытта Қазақстан арқылы өтетін көлік дәліздері арқылы жүк жеткізудің бірнеше нұсқасын ұсына аламыз» – деген Павел Соколов ҚТЖ бүгінгі таңда барлық іскерлік белсенділігін логистикалық компаниялары арқылы ұсынып отырған транзиттік уақыттың сақтауы үшін көрші елдердің теміржолдарымен байланысты дамытуға бағыттап отырғанын жеткізді.

Жиынға қатысқан Маңғыстау облысының әкімі Ералы Тоғжанов Елбасы саясатының арқасында тәуелсіздік жылдары елімізде 2,5 мың шақырым жаңа теміржол мен 12 мың шақырымнан астам автожол салынғанын, теңіз жағалауында жаңа көпфункционалды порт және соңғы үлгідегі логистикалық орталық бой көтергенін атап өтті. Айтуынша, Фидер кемесі іске қосылғаннан кейін жүк тасымалы бірден артқан. Порттың табысы 2020 жылға қарай 40 пайызға ұлғаймақ екен. Облыс әкімі мұны жақсы көрсеткіш деп бағалады. Бұл тек біздің өңірімізде ғана емес, бір желіде орналасқан басқа елдердің де тасымалы артатындығын көрсетеді.

Конференцияда ҚР ИДМ Көлік комитеті төрағасының орынбасары Қайриден Нұркенов баяндама жасап, порттардың қуатын арттыру мақсатында Ақтау портында екі жаңа терминал салынғандығын, бүгінде қазақстандық порттардың қуаты 26 млн тоннаға дейін жетіп отырғандығын мәлімдеді.

Ал, Ақтау халықаралық теңіз сауда портының президенті Абай Түрікпенбаев Ақтау теңіз порты елімізді жаһандық және өңірлік нарықтармен байланыстыратын аса маңызды транзит екендігін айта келе, конференцияда жасалған ұсыныстар барлық қатысушыларға пайдалы боларына, бұл іс-шара өзара тиімді көлік стратегияларын құру жолындағы ортақ мақсаттарға қол жеткізуге және транзиттік жүктерді тартудың тиімді тетіктерін құруға ықпал етеріне сенімділігін жеткізді. «Осындай маңызды имидждік оқиғаның қазақстандық алаңда өткізілуі отандық көліктіклогистика секторын дамытуға мол мүмкіндік бермек», – деді ол.