Кілең ер азаматтардан тұратын ұжымды әйел адам басқарады
«Қазақстан теміржолшысы» газетінің тілшісі
Астана локомотив пайдалану депосында локомотив бригадалары резервінің бастығы Мәрия Бимұханова – кілең ер адамдар қызмет ететін ұжымды басқарып отырған әйел. Мұндай қызметті атқару үшін кәсіби біліктілікпен қоса қайсар мінез бен ерік-жігер керек дер едік.
Локомотив саласында 14 жылдан бері еңбек етіп келе жатқан Мәрия Бимұханова басқаратын бөлімнің негізгі міндетіне – локомотив бригадаларын уақытылы жұмысқа шақыру, олардың әрқайсысының сағаттары бойынша жұмысқа шығу уақытын кестеге салып реттеп, рейстен келгендері мен кеткендерін қадағалап отыру, сонымен қатар бригадалардың демалысы мен еңбек тәртібінің сақталуын бақылау, т.т. кіреді. Бүгінде депода барлығы 665 машинист пен көмекші машинистер еңбек етсе, соның бес жүзге жуығы елорда депосында, қалғаны Атбасардағы айналым депосына тиесілі.
– Тоғыз жолдың торабында орналасқан станциядан жан- жаққа кететін жүк және жолаушылар пойыздарының локомотивтерін тізгіндеуші машинистердің бәрі – ер адамдар екенін білесіздер. Әйелдер тек біздің бөлімде жасақшылар арасында ғана бар. Бөлімде 4 кезекші, 4 жасақшы, 4 оператор жұмыс істейді. Әсіресе, жүк локомотивтерінің бригадаларын жұмысқа шақыруда бәрін қадағалауда ұстаймыз. Шақыртамыз, жұмыс киімін, медициналық тексерілуін, өзімен бірге құжаттарының болуын тексеріп, тіркейміз. Жасақшылар бригадаларды жұмысқа шақырмай қалса, локомотив те жүрмейді деген сөз, сондықтан машинистер мен көмекшілері үнемі телефондары қосулы, бізбен байланыста отыруы керек. Арнайы бағдарлама бойынша демалған уақыттарына қарай кезегі келіп тұрған кез келген бригаданы жұмысқа шақырамыз, – дейді кейіпкеріміз.
Әу баста есепші мамандығын алып, біраз сол салада еңбек еткен Мәрия бертін келе екінші мамандық алып, теміржол саласына ауысыпты.
– Үйде бес қыз, бір ұлмыз. Әкем ер мінезді қылып өсірді, сондықтан ер азаматтардан тұратын ұжыммен жұмыс істеуде мен үшін еш қиындық болған жоқ. Әрі бала кезімнен техникаға құмар болып өстім, көлікті жақсы көретінмін. Сондықтан осында ғана өз орнымды тапқандай сезімде болдым, – дейді ол.