Жаңа-Семей жол дистанциясында түрлі ұлт өкілдері ұйыса еңбек етіп келеді
Шығыс Қазақстан облысы бойынша меншікті тілші, Семей
Шығыстағы Жаңа-Семей жол дистанциясында ондаған ұлттың өкілдері тізе қоса еңбек етуде. Солардың ішінде татар ұлтының өкілдері бір төбе. Олар тек сала қызметінде ғана емес, Семей ЖТ бөлімшесінің қоғамдық өмірінде де аса белсенді.
Басым көпшілігі қалалық Достық үйіндегі татар этно-мәдени ұйымының белсенді мүшелері саналады. Сондай-ақ, тілдер орталығындағы кешкі мектептерде тіл үйреніп жүргендері де бар. Семейлік теміржолшылар арасында Зульфия Мәжитқызын білмейтін жан жоқ. Жаңа-Семей жол дистанциясында кәсіп- одақ төрайымы болып еңбек ететін татар қызын бөлімшеде өтетін барлық шарадан көруге болады. Өзі спортшы, ән мен биді де нақышына келтіре орындайды. Әрі ұйымдастырушылық қабілеті жоғары болғандықтан басшылық қоғамдық салада жауапты жұмыстарды Зульфияға сеніп тапсырады. Сондай шаралар арасында оған ерекше ұнайтыны – Наурыз мерекесі мен 1 мамыр – Қазақстан халқының бірлігі күні. Айта кету керек, әріптестері Зульфияның татар қызы екенін осындай мерекелерде ғана еске түсіреді. Себебі, таза қазақша сөйлейтін келіншектің жергілікті қаракөздерден түк те айырмашылығы жоқ.
– Татарлар Семейдегі жергілікті халық санатына жатады. Бабаларымыздың бұл өлкеге қоныстанғанына ғасырдан аса уақыт өтті. Сондықтан менің Отаным – Қазақстан, оған ешкімнің таласы болмаса керек. Айта кетер тағы бір жайт, өткен ғасырдың тоқсаныншы жылдары өзге этнос өкілдері тарихи отандарына жаппай қоныс аударған шақта, «көппен көрген ұлы той» деп туған мекеннен табан аудармаған бірден-бір ұлт – татарлар. Бұл – мен үшін мақтаныш, – дейді Зульфия.
Теміржолшы татар қызы сондай-ақ, дәл осы Семей қаласына Татарстан рес- публикасының бұрынғы президенті Минтимер Шаймиевтің арнайы сапармен келіп, жергілікті татар диаспорасымен кездесу өткізгенін де еске алды. Татар елінің қазіргі басшысы Рустам Минниханов та қала үшін арнайы тал көшеттерін жіберіп, 1 мамырда оны Бейбітшілік алаңына барша ұлт өкілдері бірлесіп отырғыз- ғандарын мақтанышпен жеткізді.
Екі перзент тәрбиелеп отырған Зульфияның жанұясы тек таза қазақ тілінде сөйлеседі, татар тілін сирек қолданса, орысша тек қызмет барысында тілдесуге тура келетін көрінеді.
– Тілге ерекше мән береміз. Балаларға оң тәрбие болуы үшін жұбайым екеу- міз тек қазақша сөйлесеміз. «Қазақстан – сенің Отаның, сондықтан ең алдымен қазақша сөйле, сосын басқа тілді меңгер» дейміз. Қызым орыс, қазақ тілдерімен қоса ағылшын тілін меңгеруде. Болашақта қытай тілін үйренуді де жоспарлайды, – дейді Зульфия.
Ұлты өзге болса да ділі қазақ, жүрегі қазақ татар қызы – Жаңа-Семей жол дистанциясының мақтанышы.