Құрметті теміржолшы Алик Досанов алпыс жасқа толды
Абай облысы бойынша меншікті тілші
Семей ЖТ бөлімшесінің кәсіподақ ұйымы төрағасы, Құрметті теміржолшы Алик Досанов ел ағасы жасы – алпысқа толып отыр. Қашан да теміржолшылар игілігі үшін атқарылып жатқан іс-шаралардың басы-қасынан табылатын жайсаң азамат кәсіподақ қызметінде ширек ғасырға жуық қызмет етіп келеді.
Алматыдағы қазақ қатынас жолдары университетін тәмамдаған Алик Тұрсынұлы еңбек жолын Семей теміржолының вагон шаруашылығында жылжымалы құрам слесарі болып бастайды. Әрі қарай вагон қараушы, нұсқаушы, шебер, аға шебер сынды сатылы еңбек жолынан өтіп, өндірісте тәжірибе жинақтайды.
1998 жылы Семей вагон пайдалану депосының ұжымы өз жұмысына жауапты, көпшілікпен тіл табыса білетін сауатты маманды кәсіподақ төрағасы етіп сайлайды. Әріптестерінің сенімін ақтауға тырысқан кәсіподақ жетекшісі теміржолшылардың әлеуметтік әл-ауқатын арттыруға ықпал ететін барлық мүмкіндікті жасауға ұмтылды. Олардың тиісті көмек түрлерін алып, салалық жеңілдіктерді пайдалануын назарда ұстап, спорттық және басқа да мәдени іс-шараларды ұйымдастыруда жетістіктерге де жетті. Өзі де осылай кәсіподақ қызметінде тәжірибе жинап, ысылды. Сондықтан да болар, 2015 жылы Алик Досанов бірауыздан «Қазақстандық салалық теміржол, автомобиль, әуе және су көлігі қызметкерлері кәсіби одағы» ҚБ-ның Семей жүк тасымалы бөлімшесіндегі филиалының төрағасы болып сайланды. Күні бүгінге дейін, міне, аймақ теміржолшыларының сенімін арқалап, абыройлы еңбектеніп келеді.
Осы жылдар аралығында Алик Тұрсынұлының ұйытқы болуымен бөлімшенің қоғамдық өмірі қайта жаңғырды десек, артық айтпайсыз. Бөлімше басшылығымен келісе отырып, теміржолшылар игілігі үшін көп жұмыс жасалды. Атап айтсақ, әр жылдарда шалғай станциялардан балалардың ойын алаңқайлары, Семей станциясынан психологиялық жүктемеден арылу бөлмесі ашылды. Жуырда ғана Семей іргесіндегі Теміржолшылар кентінде жасанды футбол алаңы мен балалардың ойын алаңқайының ашылу салтанаты өтті. Алик Тұрсынұлының күш салуымен осы ауданда көше шамдары орнатылып, асфальт төселген-ді. Бұл істердің барлығы кәсіподақ лидерінің теміржол бойындағы халық алдында абырой-беделін арттырды.
Бүгінде қайта құрылған Абай облысындағы ұжым саны ең көп салалық кәсіподақ ұйымының жұмысын ұйымдастыру мен жүргізу оңай емес екені белгілі. Ал оны жоғары деңгейдегі жетістікпен басқарып отырған Алик Тұрсынұлын жуырда аймақтағы барлық кәсіподақ ұйымдары мүшелері бірауыздан қолдап, Абай облыстық кәсіподағы координациялық кеңесінің мүшелігіне салтанатты түрде қабылданды. Жауапкершілік жүгі бұрынғыдан да ұлғая түсті деген сөз.
Ал халқымыздың «алпыс – тал түс» деген тәмсілін ескерсек, осы жасқа алғыс пен абырой арқылы аяқ басқан Алик Тұрсынұлы үшін жемісті жылдар жалғаса беретіні анық деп білеміз.