Екі рет егіз тапқан алтын құрсақты Фатима жайлы бір үзік сыр
Арыс станциясының дөңес операторы, күміс алқа иегері Фатима Бастарқызы үйде – отбасының ұйытқысы, асыл ана, аяулы жар, ал түзде – салада қырық жыл тер төгіп келе жатқан тәжірибелі теміржолшы.
Осыдан қырық жыл бұрын, 1983 жылы еңбек жолын Арыс станциясында жүк қабылдаушы болып бастаған Фатима жеті жылдан кейін белгі беруші болып ауысып, тағы он жыл еңбек етеді. Ал 2000 жылдан бері Арыс станциясының дөңес операторы.
– Фатима Жартыбаева – өте еңбекқор, жауапкершілігі жоғары жан ретінде өзін өзі танытқан тәжірибелі теміржолшы. Жұмысты ең төменнен бастап, соңғы 23 жыл дөңес операторы болып жастарды тәрбиелеп келеді. 14 шілдеде алпыс жасқа толғалы отырған құрметті әріптесімізді шын жүректен құттықтап, ұжым атынан алғыс айтқым келеді, – дейді кейіпкеріміз туралы Арыс станциясының бастығы Бөгенбай Тоқсейітов.
Фатима жары Темірхан Манайұлымен темір жол бойында танысып, 1984 жылы бас қосқан екен. Екеуі 6 перзент сүйді. Кейіпкеріміз туралы қызықты бір деректі айтып өтсек, сол алты перзентінің екеуі – егіздер. 1985 жылы туған тұңғыш ұл мен қыз – егіз, Арман Ақтауда теңіз шаруашылығында еңбек етеді, ал оның сыңары Айман Арыс қаласында сұлулық салонында жұмыс жасайды. 1987 жылы туған Айжан Шымкент қаласында кәсіпкер, 1989 жылғы Нұргүл Астанада дәрігер. 1993 жылы туған кенже ұл мен қыз – егіздер. Айбол теміржол саласының маманы, қазіргі уақытта қосымша өз кәсібі бар, оның сыңары Ақерке отбасымен Шымкент қаласында тұрады.
– Темір жолға 40 жыл өмірімді арнадым. Қызық пен шыжық қатар жүретін салада еңбек етіп, бала өсіріп отбасын асырау оңай болды дей алмаймын. Кенже егіздерім дүниеге келген соң жолдасым өмірден өтіп, аз қиналған жоқпын. Ендігі жерде 6 балаға әке де, шеше де өзім едім. Бала санымен 2017 жылы зейнетке шығып кетсем де болар еді, бірақ жұмысымды қимадым, әрі күйеуімнің аманаты ұл-қызымның бәрін оқытып, жоғары білім әперуді мақсат етіп, күш-қайратым барда еңбек етуден қашпадым. Құдайға шүкір, балаларым өмірден өз орындарын тауып, жақсы азаматтар болып өсті, менің ең үлкен бақытым да, жетістігім де осы, – дейді Фатима Бастарқызы.
