Техникалық білім мен тәжірибе қажет

Теміржол саласындағы ақпараттық технологияның қарқынды дамуы мен цифрлық жүйенің кеңінен қолданылуы байланыс саласының мамандарына жоғары талаптар қойып отыр. Біздің бүгінгі кейіпкеріміз – осы саланың білікті де тәжірибелі мамандарының бірі.

Қызылорда белгі беру және байланыс дистанциясының электромеханигі Гаухар Уалиева – кәсіби шеберлігінің арқасында заманауи байланыс технологияларын жетік меңгеріп, дистанцияда үздік маман ретінде танылған жан. Белгі беру-байланыс саласындағы техникалық жүйелерді жетік меңгеруімен қатар, ол өз білімін үнемі жетілдіруге баса назар аударады. Өйткені күн сайын алға жылжып жатқан ақпараттық технологиялар дәуірінде онсыз білікті маман атану оңай емес. 2023 жылы біліктілік арттыру курсын сәтті аяқтап, заманауи технологияларды меңгерудегі әлеуетін тағы да арттырған Гаухар биылғы жылы да кәсібіне байланысты білімін жетілдіруді көздейді.

– Пойыздардың қозғалыс қауіпсіздігін қамтамасыз ету үшін заманауи технологияларды жетік меңгеру міндет. Ғылыми-техникалық прогрестің қарқынды дамуы байланыс саласына жаңа цифрлық жүйелерді енгізуді талап етеді. Осы орайда Гаухар Мәжитжанқызы Raisecom және DX500.ЖТ байланыс аппараттарын толықтай меңгеріп, оларды тиімді пайдалану арқылы байланыс сапасын арттыруда маңызды рөл атқарып келеді. Кәсібіне адалдықты табыстың кепілі санайтын Гаухар тек өз ісінің маманы ғана емес, сонымен қатар көп жылдан бері жас мамандарға тәлімгерлік етіп, тәжірибесімен бөлісіп келе жатқан ұлағатты ұстаз. Оның еңбекқорлығы, жауапкершілігі және жаңашылдыққа деген ұмтылысы оны байланыс саласындағы ең озық мамандардың қатарына шығарды. Гаухар Мәжитжанқызы – әуе байланыс желісі, магистральды кабель желісі және талшықты-оптикалық кабель желісі сияқты үш негізгі жүйені терең меңгерген байланысшы. Бұл оның байланыс жүйелеріндегі кез келген техникалық мәселені шеберлікпен шешіп, қызметін жоғары деңгейде атқаруына мүмкіндік береді, – дейді әріптесі туралы дистанцияның өндірістік бөлім басшысы Нұрлан Жәнібеков.  

Гаухар еңбек жолын 1983 жылы осы Қызылорда белгі беру және байланыс дистанциясында қарапайым жеткізуші болып бастаған. Екі жылдан кейін байланыс электромонтері болып ауысты. Міне, содан бері бір орында тапжылмай еңбек етіп, өзінің алғырлығы мен еңбекқорлығы арқасында кәсібінің үздігі атанып отыр.  

Сонымен қатар өз саласы бойынша әріптестерімен бірге өндіріске жаңашылдық енгізуге ұмтылып, өнертапқыштықпен де айналысып, тәп-тәуір жетістікке жетіп келеді. Сондықтан дистанция бастығы Әбдірахман Сырғабаев еңбегі көпке үлгі, ал кәсіби шеберлігі – байланыс саласының дамуына серпін беретін құнды ресурс деп жоғары бағалаған Гаухар сынды мамандар әр мекеменің мақтанышы екені дау тудырмайды.  

– Теміржол көлігінің негізгі компоненттері болып саналатын белгі беру және байланыс жүйелері пойыздардың қозғалысын ұйымдастыруда, сақтауда, олардың қауіпсіздігін қамтамасыз етуде шешуші роль атқарады. Теміржол саласында оңай кәсіп жоқ. Соның ішінде белгі беру мен байланыс жүйелерінің жұмысын қамтамасыз ету – инемен құдық қазғандай қиын да күрделі, үлкен жауапкершілікті талап етеді, – дейді Гаухар Уалиева.  

Ал кәсібиліктің сыры неде деген сауалымызға: «Алдымен техникалық білім, сосын тәжірибе қажет» деп жауап берді.