Сексеуіл жол дистанциясындағы екі жол жөндеуші еңбек демалысына шықты

Сексеуіл жол дистанциясының ұжымы екі бірдей жол жөндеушіні еңбек демалысына шығарып салды. Қос теміржолшының қырық жылғы тынымсыз еңбегіне алғыс айтылып, тәлімді тәжірибелері жастарға үлгі етілді. Бөлімшенің солтүстігіндегі дистанция бастығы Мажит Құрманбаев Жаңабай Бубеков пен Айдәулет Бижанов жол шаруашылығының жұмысын бес саусақтай меңгерген, өте тәжірибелі жолшылар болғанын, сондықтан зейнетке кетіп бара жатқан әріптестер орны ойсырап қалатынын да жасырмады. Әйтсе де, «бейнеттің зейнеті болатыны рас, сондықтан қос ардагеріміз қырық жылғы ауыр бейнеттің рахатын көрсін» деп тілек білдіріп, екі теміржолшының иығына шапан жапты. Жолшылар ұжымының кәсіподақ төрағасы Көбейсін Рысмамбетов арнайы адресат пен ескерткіш сыйлық табыс етті. – Жұмыс болғасын неше түрлі жағдайлар болады, дегенмен ең басты мақсатымыз пойыздардың қауіпсіздігін сақтау деген ұранмен жұмыс жасағандықтан бәрін жиып қойып, өздеріне бекітілген тапсырманы мүлтіксіз орындайтын нағыз теміржолшылар кім десе, міне деп ұялмай көрсететін қос жолшымызды қимасақ та құрметті еңбек демалысына шығарып салып отырмыз. Ендігі жерде отбасы, бала-шағаның ортасында ұзақ жылғы ақ адал еңбектің тек жемісін көріңіздер, – деп тілек білдірді Көбейсін Рысмамбетов. Жаңабай Бубековтің әкесі де кезінде осы дистанцияда жол шебері болып жұмыс жасапты. Бүгінде екі інісі осы жол дистанциясында, бір інісі Сексеуіл локомотив депосында еңбек етіп, әке жолын абыроймен жалғастыруда.