Құрықтың қақпасы – Қарақия
«Қазақстан теміржолшысы» газетінің тілшісі
Маңғыстау мен Өзен-Болашақ станциялары аралығында жатқан маңызды темір жол нысаны Қарақия станциясының тарихы сонау 1965 жылдан бастау алады. Осы бағытта жүк тасымалын қамтамасыз ететін төртінші класты станцияда 30-ға жуық теміржолшы еңбек етеді.
Станция бастығы Абай Зейнелғабитовтің айтуынша, бұрын Ералы станциясы деп аталып келген бекет атауы Үкімет қаулысымен 2017 жылы Қарақия деп өзгертілген. Мұндағы теміржолшылардың қатарын жолшылар, вагон қараушылар, пойыз құрастырушылар, 4 станция кезекшісі, 3 жүк қабылдап-тапсырушы, 1 тауар кассирі құрайды. Осы құраммен олар Қарақиямен қоса Боржақты және Ерсай станцияларындағы жүк тиеу мен түсіру жұмыстарына атсалысуда.
– Қарақия – шағын болса да маңызы зор станция. Бүгінде ол стратегиялық маңызға ие Құрық портының қақпасы сынды роль атқарып отыр. Жүктің дені Теңдіктен келетін жанар-жағармайды Құрыққа маневрлік жұмыстар арқылы вагондармен жеткізіп береміз. Сондайақ, біз жүк пойыздарын уақытында жеткізіп, қадағалау, одан әрі Жетібай станциясына, Өзен станциясына бағыттаймыз. Сонымен қатар ауыл халқын Шетпеден келетін су цистерналары арқылы ауыз сумен қамтып отырмыз, – дейді станция бастығы.
Бүгінгі таңда Қарақия станциясын да жүк қабылдап-тиейтін 3 жол және 7 тұйық бар. Жыл басынан бергі 6 ай ішінде станция арқылы 100-ге жуық жүк вагоны түсіріліп-тиеліпті. Келетін жүктердің қатарында Құрыққа бағытталатын жанар-жағармайдан басқа Қарақия ауданының орталығы Құрық кентінде салынып жатқан жаңа нысандар үшін құрылыс материалдары бар.
Станцияның өзінен Қазақстанның барлық өңірлеріне бағытталатын техникалар тиеледі екен. Жақында мұндағы теміржолшылар Боржақты станциясында ауыр салмақты габаритті емес жүктер тиеу жұмыстарын жүргізген. Сонымен қатар әскери жаттығулар кезінде де ауыр әскери техникалар түсіру жұмыстарына араласады. 500-ге жуық халқы бар Қарақияда бір балабақша, бір бастауыш мектеп жұмыс істеп тұр. Станция бастығының айтуынша, станция өмірінде жылда болатын жақсы жаңалық – «Жәрдем» пойызы келіп, халыққа қызмет етеді. Бұл медициналық пойызды жыл сайын халық сағынып күтеді екен. Алдағы қыркүйек айында келетін пойызды күн санап күтіп жүргендер бар деп күлді станция бастығы.
Салалас кәсіпорындарда еңбек ететін отызға жуық теміржолшы илегендері бір терінің пұшпағы болған соң сенікі-менікі деп санаспай бірбіріне көмектесіп, жұмыла жұмыс істеп, соның нәтижесінде қозғалыс қауіпсіздігіне титтей де нұқсан келтірмей келеді.