Атырауда станциялардың күзгі техникалық тексерісі басталды

  Атырау жүк тасымалы бөлімшесінде күзгі комиссиялық тексеру жұмыстары басталды. Қалыптасқан тәртіп бойынша байқау барысында қозғалыс қауіпсіздігі, еңбек қорғау және техникалық құралдардың, магистральдық желі мен ғимараттардың жай-күйі, сондай-ақ теміржолшылардың білімі мен біліктілігі де сынға түседі.

«Бөлімше басшыларынан құрылған комиссия күзгі байқауды арнайы локомотивпен телім бойын аралап жүріп жүзеге асыруда. Бір ай уақытты қамтитын тексеріс ең әуелі 496-402 разъезд аралығы, Мақат-Құлсары, Мақат-Сағыз телімдерінен басталып, Құлсары-Бейнеу, Бейнеу-Атырау, Теңдік және Ақжайық станциялары, Ганюшкино-Д.Нұрпейсова телімі бойынша жүргізіледі. Ганюшкино-Исатай, Исатай-Қызылжар телімдеріндегі жол, сигнализация, энергиямен қамту дистанциялары, вагон, локомотив деполары, т.б. қаралады. Содан кейін Махамбет, Атырау станцияларына тоқтап, сол жерлерде талқылау жұмыстары жүргізіледі» дейді Атырау жүк тасымалы өндірістік-техникалық бөлім басшысы Әзиз Айжарықов.  

Жалпы, биылғы жылдың өткен 8 айында Атырау бөлімшесі бойынша пойыз және маневрлік жұмыстарда өндірістік жарақат алу болған жоқ. Өндірістік көрсеткіштерді орындауда нәтижелер жақсы деңгейде келе жатыр. Күзгі тексеріс кезінде станциялардың техникалық жағдайы, магистральдық инфрақұрылым мен жасанды құрылғылардың жағдайы, су мен жылу нысандары, өрт қауіпсіздігін сақтау ережелері, орталықтың бұйрықтары мен басқа да нұсқаулықтарын орындау тәртібі қаралуда. «Былтырғы күзгі тексеріс барысында станцияларда кездескен кемшіліктерді биыл қайта қарап жатырмыз. Негізінен алғанда, темір жол торабында болған келеңсіз жағдайлар тіркеле бермейді, станция қызметкерлері тарапынан нұсқаулықтар дұрыс жүргізілмей, кейбірінде радиобайланыс жеткіліксіз болып қалады. Станцияларда кезекшілер жаңа нұсқаулықпен жұмыс жасауға біртіндеп көшуде, білім жетілдіру, жүк қабылдап-жөнелту бойынша ескертпелер болды. Ал, толықтай көрініс тексеріс қорытындысында белгілі болады» дейді бөлім басшысы.