Жол айрықтарына да аял жасауда

Атырау жүк тасымалы бөлімшесінде күзгі комиссиялық байқау жұмыстары жалғасып жатыр. Қыркүйек айының 27-нен басталған шараның алғашқы аптасында комиссия мүшелері Атырау – Қызылжар – Исатай, Исатай – Ганюшкино, Ганюшкино – Д.Нұрпейісова телімдерін аралады.

Комиссия қозғалыс қауіпсіздігі, еңбек қорғау және техникалық құралдар мен ғимараттардың жай-күйі, байланыс, электр жабдықтарының, локомотивтер мен вагондардың жағдайы, темір жолдың, жалпы инфрақұрылымның қазіргі күйі, сондай-ақ теміржолшылардың білімі мен біліктілігі, әлеуметтік жағдайлары, т.б мәселелерді жан-жақты мұқият тексерді. Комиссия құрамындағы ревизорлық топ, Атырау жүк тасымалы және магистральдық желі бөлімшесінің құрылымдық бөлімдерінің мамандары жұмыстарын Қызылжар бекетінен бастап, ақырғы Д.Нұрпейісова станциясына дейінгі барлық станция-бекеттердегі тексеру барысында шаблон арқылы жол параметрлерінің талапқа сәйкестілігі, нормативтік, техникалық құжаттамалардың дұрыс толтырылуы, вагон шаруашылығы, байланыс және электр жабдықтарының, бағыттамалы бұрмалардың жарамдылығы, станциялардың техникалық жағдайы, магистральдық инфрақұрылым мен жасанды құрылғылардың жағдайы, су мен жылу нысандары, өрт қауіпсіздігін сақтау ережелері, орталықтың бұйрықтары мен басқа да нұсқаулықтарын орындау тәртібі, т.б. мәселелерді назардан тыс қалдырмады.

– Былтырғы күзгі тексеріс кезінде станцияларда анықталған кемшіліктерді биыл қайта қарап жатырмыз. Негізінен алғанда, темір жол торабында болған келеңсіз жағдайлар тіркеліп, үнемі ескеріліп отыруы қажет, станция қызметкерлері тарапынан нұсқаулықтар жүргізуде кемшіліктер болады, кейбірінде радиобайланыс жеткіліксіз болып қалады, жолдардың сапасын, бағыттамалы бұрмалардың жұмысын да қарадық. Станцияларда кезекшілер жаңа нұсқаулықпен жұмыс жасауға біртіндеп көшуде, білім жетілдіру, жүк қабылдап-жөнелту бойынша, байланыс, электрмен қамту бойынша да ескертпелер бар. Әрине, мұндағы мақсат – кемшілік табу емес, оны түзету және болдырмаудың шарасын жасау. Ең бастысы – қозғалыс қауіпсіздігін сақтау. Сондықтан да барлық жағдай бойынша сын-ескертпелер беріліп, жергілікті жерде талқыланды, – дейді аймақтық бас ревизор Жәнібек Көбеев.  

Комиссия мүшелері Атырау – Д.Нұрпейісова телімі аралығындағы Аққыстау, Исатай, Сазанқұрақ, Ганюшкино, Д.Нұрпейісова сынды станциялардан бөлек барлық шағын разъездерге де, жол айрықтарына дейін аял жасап, жұмыстарын жалғастыруда.