Маңғыстау станциясында биыл шұғыл тежегіш 10 рет қолданылған
Маңғыстау облысы бойынша меншікті тілші
Маңғыстау станциясында жыл басынан бері пойыздардың шұғыл тежегіш пайдалануының 10 дерегі тіркелген. Қазір сол фактілер бойынша 7 мал иесі анықталып, әкімшілік жауапқа тартылыпты.
Темір жолға иесіз малдың шығуының алдын алу мақсатында 6 наурыз күні Маңғыстау станциясы желілік полиция бөлімінің әкімшілік полиция бөлімшесі мен Маңғыстау жол дистанциясының қызметкерлері бірлесе профилактикалық жұмыстар жүргізді.
– Пойыз машинистері шұғыл тежеуді жиі қолданатын аумақтардағы темір жолға жақын орналасқан елдімекендерге барып, тұрғындар мен шаруа қожалықтарының иелерімен кездестік. Оларға темір жол бойында мал жаюға болмайтынын, ал мал жолға шыға қалған жағдайда иесі қандай жауапкершілікке тартылатынын ескерттік. Сондай-ақ малдың жолға шығуы пойыздардың қозғалыс қауіпсіздігіне қауіп төндіретінін және үлкен шығынға ұшырататынын түсіндірдік, – деп ақпармен бөлісті Маңғыстау станциясындағы ЖПБ әкімшілік полиция бөлімшесінің бастығы Нарбек Жөнелбаев.