Мектеп оқушыларына теміржолдағы қауіпсіздік бойынша дәріс оқылды
Маңғыстау облысы бойынша меншікті тілші
20-30 мамыр аралығында өтіп жатқан «Абайлаңыз, балалар!» республикалық акциясы аясында Маңғыстау станциясындағы желілік полиция бөлімінің ұйымдастыруымен Маңғыстау локомотив пайдалану депосы мен станцияға жақын маңда орналасқан №1 мектепте арнайы жиын өтті.
ҚР ІІМ-нің Көліктегі полиция департаментінің нұсқауына сәйкес өткен бұл дәріс мектептің бірнеше сыныбын қамтыды. Маңғыстау станциясындағы желілік полиция бөлімінің ӘПБ бастығы Нарбек Жонелбаев жазғы демалысқа шыққан балалардың қауіпсіздігі, теміржол бойында болатын түрлі келеңсіз жайттардың алдын алу бойынша лекция оқыды.
– Қазір жан-жақтан естіп, көріп те жүрміз, қызыққұмар жасөспірімдер әлеуметтік желіде танымал болу үшін неше түрлі әрекетке барады. Трендте боламын деп теміржол бойында да түрлі әрекеттер жасап, фото, видео түсіру үшін рельстің, тұрған вагондардың үстіне шығып кетуі мүмкін. Сондықтан мұндай әрекеттердің қаншалықты қауіпті екенін нақты мысалдармен түсіндіріп, балалар пайдасыз істермен әуестеніп, өз өмірін тәуекелге тікпеуі керек екенін түсіндіруге тырыстық. Депо қызметкерлерін де бұл жағынан сақ болуға, бірлесе жұмыс істеуге шақырдық, – дейді Нарбек Жонелбаев.