Жол қауіпсіздігіне төрт түлік малдан төнетін қауіп-қатер сейілмей тұр

Маңғыстау жол дистанциясына қарасты аумақта өткен жылдың басында пойыздың үш рет мал басуы орын алған. Биыл бір бас мал басу оқиғасы тіркелген. Салыстырмалы түрде жағдай былтырғыға қарағанда азайған деуге болады.

Десек те, жол қауіпсіздігіне төрт түлік малдан төнетін қауіп-қатер бәрібір сейілмеген. Мәселен өткен жылы қаңтарда пойыз машинистері 9 рет шұғыл тежегішті қолданып, 0,45 жанармайды артық жаққан болса, биыл ол әлдеқайда жоғары. Тек өткен айда машинистер малды баспас үшін 12 мәрте оқыс тежеу жасауға мәжбүр болып, 0,60 тонна дизелдік отынды текке жаққан.  

– Биылғы пойызға мал басылу дерегі №15-16 бекет аралығында кездесіп отыр. Осы маңда мал басу оқиғалары жиі кездеседі. Жалпы өткен жылы біздің дистанция бойынша 28 мал басу дерегі тіркелді. Алдыңғы жылдан екі есеге көбейген. Биыл да жыл басынан төрттүліктің жолға шығуы қайталанып, бір малды пойыз басып кетті. Былтыр пойыз машинистері 159 рет шұғыл тежеу берген. Сондықтан қауіп қатердің алдын алу үшін қоршау салу, халықпен кездесіп түсіндіру жұмыстарын жүргізу ұдайы өткізілуде. Дегенмен бұл мәселеге тұрғындар да, мал шаруашылығы иелерінің де жауапкершілікпен қарағаны өте маңызды. Себебі біз қанша жерден түсінік жүргізіп, әкімдерге хат жазып, жолды қоршасақ та жергілікті халық малдарын қараусыз жібере берсе, бұл түйткілдің түйіні тарқатылмайтын түрі бар. Адамдар кейде малын жақын жерден алып өту үшін қоршауды өздері бұзатыны да жасырын емес. Біз жылда қоршау саламыз, жөндейміз. Мысалы 2024 жылы жүз шақырымға жуық аумақтың қоршау мәселесі шешілді, десек те жағдай әлгіндей, баяғы жартас, сол жартас, – дейді Маңғыстау жол дистанциясының жетекші жол инженері Ержан Артықбаев.  

Айтуынша, дистанцияда биыл да қоршау тұрғызу жұмыстары жалғасады екен. № 12-13, 15-16, ст.Жетібай - ст.Жаңаөзен аралықтарында 53 шақырым жаңадан қоршау салу жұмыстары жоспарланған.