Теміржол өткелінде қауіпсіздік шаралары түсіндірілді

Жуырда Маңғыстау жол дистанциясы мен желілік полиция қызметкерлері бірлесіп автокөліктер қозғалысы жиі өткелдерде жүргізушілермен кездесу өткізді.

Теміржол өткеліндегі профилактикалық іс-шаралар Жаңаөзен қаласы мен Қарақия, Мұнайлы, Маңғыстау аудандарында жүргізілді. Дистанция қызметкерлері полиция инспекторларымен бірге аталған теміржол өткелдерінде автокөлік жүргізушілерімен кездесіп, теміржолдан өту ережелерінен түсінік берді. Бұл алдын алу іс-шаралары аясында бұдан басқа техникалық сабақтар және тәжірибелік жұмыстар да ұйымдастырылған.  

– Теміржол өткелі – өте қауіпті аймақ. Одан өтерде қарапайым жол ережесін сақтамау салдары қаншама қауіп-қатерді туындатуы мүмкін. Осы жылдың 16 қаңтарында Алматыда Жетіген – Алтынкөл теліміндегі теміржол өткелінде осындай себептен жол-көлік оқиғасы тіркелген еді. Мұндай жағдай өткен жылдың соңғы айында Түркістан – Шорнақ күзетпелі теміржол өткелінде де жүк көлігі жүргізушісінің қателігі салдарынан болған болатын. Сондықтан теміржол өткеліндегі жол-көлік оқиғаларының алдын алу бағытындағы қауіпсіздік шаралары күшейтіліп жатыр. Дистанция аумағында профилактикалық түсіндіру іс-шараларын өткіздік. Көліктер қатынасы жоғары аумақтардағы автокөлік жүргізушілерімен сөйлесіп, темір жолдан өту ережелерін қайталап, тағы да есіне салдық, – деген Маңғыстау жол дистанциясының жетекші инженері Мұхтар Кульчанбаевтың айтуынша, түсінік жұмыстары Бекет 13-ст.Шетпе, ст.Шетпе-Бекет 14, Бекет 14-15, 15-16, Бекет 16-Тамақ, Тамақ-ст. Маңғыстау, ст.Маңғыстау-Бекет «Р», Бекет «Р»-ст.Боржақты, ст.Боржақты-ст.Қарақия, ст.Қарақия-ст.Жетібай, ст.Жетібай-ст. Жаңаөзен аралықтарындағы және ст.Жаңаөзендегі 305, 314, 324, 337, 368, 377, 388, 399, 2, 13, 70, 73, 115, 121, 137, 151, 179, 181-шақырымдарда орналасқан күзетпелі және күзетпесіз теміржол өткелдерінде жүргізілген.