Еңбекті қорғау – қауіпсіздік кепілі

28 сәуір – Дүниежүзілік еңбекті қорғау күніне орай «ҚТЖ» ҰК» АҚ-да осы салаға үлес қосып жүрген қызметкерлерді марапаттау рәсімі өтті. Теміржолшылар мен кәсіподақ өкілдері қатысқан жиында компанияның бас инженері Рамазан Садырқұлов пен «Қазкөліккәсіп» ҚБ төрағасы Оразғали Ахметбаев сөз сөйлеп, үздік мамандарды құттықтады.

Жиынға қатысушылар жұмыс орындарында көз жұмған әріптестерін 1 минут үнсіздікпен еске алды. Бас инженер Р. Садырқұлов биыл бұл атаулы күн «Еңбек қауіпсіздігі мен гигиенасына революциялық тәсілдер: жұмыс орындарындағы жасанды интеллект пен цифрландырудың рөлі» тақырыбына арналғанын атап өтті.  

– Біз цифрлық шешімдер барлық саланы, соның ішінде еңбек қауіпсіздігін де шарпыған дәуірде өмір сүріп отырмыз. Ал біздің компания заман көшінен қалмай, қатар ілесіп келе жатқанын айта кету керек. Цифрландыру еңбек қауіпсіздігін қамтамасыз етуде және жұмыс тиімділігін арттыруда өте маңызды рөл атқарады. Өздеріңіз де жұмыс барысында түрлі қосымшаларды пайдаланып жүрсіздер, солардың қатарында «Өндірістік қауіпсіздіктің біріктірілген жүйесі» қосымшасы да бар. Осы салада тынымсыз еңбек етіп жүрген қызметкерлердің арқасында еңбек қауіпсіздігі бойынша көрсеткіштер бұрынғыдан әлдеқайда жақсы. Бұл сіздердің еңбектеріңіз, қауіпсіздікке қосқан үлестеріңіз үшін алғысым шексіз, «жарақат алуға нөлдік төзушілік» ұстанымына берік болып, темір жолдағы қауіпсіз қызметті бірге атқара берейік, – деді бас инженер.  

«Қазкөліккәсіп» ҚБ төрағасы Оразғали Ахметбаев Еңбек қорғау күнінің мәні мен маңызы туралы баяндай келе, бұл күн әлемдік жұртшылықты еңбек қорғау мен өндірістік қауіпсіздік мәселелеріне назар аудартуға шақыратынын жеткізді.  

– Бүгін әлемнің 100-ден астам елдерінде түрлі іс-шаралар өткізілуде. Биылғы тақырып бойынша жасанды интеллект деректер талдауын жүргізу, үдерістерді автоматтандыру арқылы еңбек қорғау тиімділігін арттыратынын айта кету керек. Мұның бәрі өндірістік жарақат алуды болдырмауға септік етеді. Сондықтан биылғы тақырыптың мәні мен мағынасы зор, баршаңызды осы жолда адал әрі кәсіби биік деңгейде еңбек етуге шақырып, қызметтеріңізге табыс, қауіпсіз еңбек тілеймін, – деді О.Ахметбаев.  

Одан әрі «Еңбек қауіпсіздігі мәдениеті» корпоративтік курсының жұмысы туралы шағын бейнеролик көрсетілді. Бұл курстан компанияның Жамбыл, Қызылорда, Шымкент және Алматы өңірлерінде еңбек ететін қызметкерлері өткен. Курс мақсаты – әрбір қызметкердің қауіпсіздік туралы саналы түсінігін қалыптастыру, әрбір әрекеті үшін жауапкершілік ала білуге тәрбиелеу. Биыл жыл соңына дейін 30 мың қызметкерді осы курс бойынша оқыту жоспарланып отыр.  

Жиын соңында бас инженер Ақмола, Ақтөбе, Достық, Алматы, Түркістан, Қарағанды, Атырау және Астана өңірлерінен келген 12 еңбек қорғау инженерлері мен бас мамандар, жетекші инженерлер, оқу орталықтарының басшыларын компанияның басқарма төрағасы Нұрлан Сауранбаевтың атынан Алғыс хаттармен марапаттады.