Теміржолшылардың төтенше жағдайға дайындығы пысықталды
«Қазақстан теміржолшысы» газетінің тілшісі
Биылғы 15 мамырда Жаңаесіл станциясында локомотив бригадасы таңертеңгі сағат 9.55- те станция кезекшісіне 217 км-дегі 1 пикетте өрт ошағы пайда болғанын хабарлады. 0,2 га аумақты шарпыған өрт салдары жақын елді мекендер мен орман өсімдіктерін отқа орау қаупін туғызды.
Бұл Жаңаесіл станциясындағы парк аумағында «Қатты жел мен құрғақ шөптен теміржолда шыққан шартты өртті жою жұмыстарын ұйымдастыруға практикалық іс-шаралар өткізу» деп аталатын өрт-техникалық оқу-жаттығуының сценарийі еді. Оқу-жаттығуға аталған станция теміржолшыларымен қатар «Ақмола-ЖТ» бөлімшесі, Ақмола магистральдық желі бөлімшесінен ПЧ-16 мекемесі, ПЧ-14, ШЧ-13, ЭЧ-7, ТЧЭ-9, ВЧД-34, әскери күзет қызметі және осы станциядағы өрт пойызы, сондай-ақ Солтүстік Қазақстан облыстық ТЖД мен Ғ.Мүсірепов ауданының ТЖ бөлімі қызметкерлері қатысты.
– Жалпы іс-шараның мақсаты – техногендік сипаттағы төтенше жағдай салдарын жою және өрт сөндіруді ұйымдастыру бойынша практикалық іс-шараларды өткізуді пысықтау. Сонымен қатар тиісті мекемелердің төтенше жағдай кезінде жұмысқа шектеулі уақытта дайын болуға әзірлеу, құрылымдарды тұрақты басқаруды қамтамасыз ету еді. Әрі осындай жаттығулар барысында теміржол мен мемлекеттік мекемелер бойынша өрт сөндіру бөлімшелерінің өзара іс-қимылы да тексеріледі, – дейді Жаңаесіл станциясының бастығы Нұрбол Назаров.
Оқу-жаттығу кезінде зардап шеккендер қауіпті аймақтан оқшауландырылып, медициналық көмек пункттеріне жеткізілді. Оларға жедел жәрдем қызметі алғашқы медициналық көмек көрсетіп, ауруханаға жөнелтті.
Қауіпсіздік бойынша ескерту белгілері қойылып, апатты-құтқару жұмыстары жүріп жатқан жердегі оперативтік штабпен байланыс ұйымдастырылды. Өрт сөндіруге жұмылдырылған қызметкерлердің қауіпсіздік техникасын сақтауы қадағаланды. Іс-шараны өткізу бойынша жедел штаб құрылып, оқу-жаттығу нәтижесінде анықталған кемшіліктер бойынша хаттама толтырылды. Оларды жою үшін тиісті мекемелерге тапсырмалар берілді. Жалпы оқу-жаттығу жоғары деңгейде ұйымдастырылып, оң баға берілді.