Өткелдегі қатер

Тараз қаласының аумағында бұрын үш бірдей станция болатын. Облыс орталығына жақын аудандарға қарасты елді мекендерді қосып, аумағы кеңейгелі бері Тараз, Талас, Бурылмен бірге Шайқорық станциясы да шаһардың бір бөлігіне айналды.

Соның ішінде кластан тыс Тараз станциясы аумағы, жұмыс ауқымы жағынан ең ірісі болса, Бурыл қаланың негізгі стратегиялық объектілерін жалғап жатыр. Бурыл станциясында екі күзетілмейтін, бір қызметтік өткел бар. Әсіресе оңтүстік-шығысындағы «Ауыл береке» базарының сыртынан өтетін теміржол учаскесіндегі өткелде автокөлік ағыны өте жоғары. Ал шаһарға келетін азық-түлік және құрылыс заттарының тауар айналымы осы станция арқылы сұрыпталады. Сондықтан бұл жол қозғалысында қауіп-қатер туындауы мүмкін аймақтың бірі саналады.  

Бурыл станциясының бастығы Нұрлан Сәкенұлының айтуынша, екінші өткел станцияның маневрлік жұмыстары жүргізілетін негізгі аумақта орналасқан.  

– Шаһардың бұл аймағында жеке тұрғын үйлер тура шойын жолды қос қапталынан жағалай жақын қоныстанған. Сол маңда 2 орта мектеп пен бір аурухана бар. Мұнда жаяу жүргіншілердің қозғалысы қауырт. Сол себепті станция аумағында профилактикалық іс-шаралар жиі өткізіледі. «Назар аудар, жолда адам!» айлығы басталғалы бері барлық ауысымдағы станция қызметкерлеріне қозғалыс және еңбек қауіпсіздігін сақтау туралы нұсқаулар түсіндірілуде. Апта басында арнайы техникалық сабақ өткізіледі. Тұрғындарды қауіпсіздіктің қатаң талаптарын сақтауға шақыру үшін алдымен теміржолшылар ереже-нұсқауларды жақсы білуі тиіс. Себебі біз екінші санаттағы жүк вагондарын сұрыптау станциясы болғандықтан, айына екі мыңнан аса жүк қабылдаушыға жүктерді сұрыптап тапсырамыз. Маневрлік жұмыстар кезінде 48 кірме жолдағы қауіпсіздік мәселесін бақылауда ұстауымыз керек, – дейді Нұрлан Сәкенұлы.  

Бурыл станциясындағы қозғалыс қауіпсіздігіне қатысты бір мәселе – тұрғындардың рұқсат етілмейтін қызметтік өткелді кесіп өтуінің тыйылмай тұрғаны. Станция мамандары бұған қоғамдық көліктердің соңғы нүктесі осы маңда орналасқаны себеп болып отырғанын алға тартты. Егер автобустар рұқсат етілген өткелге дейін барса, жаяу жүргіншілердің қызметтік өткелді кесіп өтуі азаяр еді дейді.