Шиеліде оқушыларға қауіпсіздік ережелері түсіндірілді

Әскерилендірілген теміржол күзетінің жергілікті құрылымы Шиелі станциясы аумағында қауіпсіздік шараларын күшейтіп, пойыз қозғалысы мен тұрғындардың амандығын қамтамасыз ету бағытында жүйелі жұмыстар жүргізуде.  

Әскерилендірілген теміржол күзетінің Шиелі атқыштар тобының бастығы Жандос Тармановтың мәліметіне сүейенсек, биылғы екі айда  521 пойыздың 19 103 вагоны күзетке алынып, ерекше жұмыс режимі аясында толық бақылаудан өткізген. Әр құрамның қозғалысын жіті назарда ұстауда. Қозғалыс қауіпсіздігіне қатысты берілген барлық нұсқаулықтар мен тапсырмалар толық көлемде орындалып келеді.

Темір жол – маңызды нысан әрі аса қауіпті аймақ. Әсіресе адам факторының рөлі айрықша. Осы мақсатта Әскерилендірілген теміржол күзеті мен желілік полиция бөлімшесі қызметкерлері Шиелі кентіндегі жол бойына жақын орналасқан №219 Ы.Алтынсарин атындағы орта мектеп оқушыларымен арнайы кездесу ұйымдастырылды.

Кездесу барысында теміржол аймағында жүру ережелері, қауіпсіздік талаптары және абайсыз әрекеттің салдары кеңінен түсіндірілді. Әскерилендірілген теміржол күзеті қызметкерлері балаларға теміржол бойында ойнаудың, жолды белгіленбеген жерден кесіп өтудің қаншалықты қауіпті екенін нақты мысалдармен жеткізіп, темір жолдың аса қауіпті аумақ екендігі жайлы ақпараттық, ескерту парақтары тапсырылды.

Әскерилендірілген теміржол күзетінің Шиелі тобының бастығы Жандос Тарманов теміржол қауіпсіздігі оларға сеніп тапсырылған аманат екенін айтады.

– Әр вагон, әр құрам біздің жауапкершілігімізде. Біз тек жүктің сақталуын ғана емес, станция аумағындағы жалпы қауіпсіздікті қамтамасыз етеміз. Тәулік бойы қырағылық танытып, кез келген қауіптің алдын алуға дайын тұруымыз керек. Тәртіп пен талап  үндестігі сақталуы тиіс. Қауіпсіздік мәселесінде әсіресе балаларға бағытталған түсіндіру жұмыстары аса маңызды. Балалар темір жолдың нақты қаншалықты қауіпті екенін толық сезіне бермеуі мүмкін. Сондықтан біз мектептерге барып, ашық әңгіме өткіземіз. Оларға пойыздың тоқтау қашықтығы, жылдамдығы, теміржол маңындағы ойынның қауіптілігі туралы түсіндіреміз. Басты мақсат – олардың санасында қауіпсіздік мәдениетін қалыптастыру. Бір баланың өмірін сақтап қалу – біздің ең үлкен жетістігіміз, – дейді Жандос Тарманов.

Аймақ көлемінде өтіп жатқан «Назар аудар, жолда адам!» және «Еңбекті қорғау және қауіпсіздік бойынша ерекше жұмыс режимі» айлықтары шеңберінде де кешенді іс-шаралар қолға алынған. Бұл бастамалардың түпкі мақсаты – әр азаматтың темір жолдың аса қауіпті аймақ екенін терең түсінуіне ықпал ету.