Тілсіз жауға тосқауыл
Абай облысы бойынша меншікті тілші
Синоптиктер биыл қуаңшылық болуы мүмкін екенін ескертеді. Демек, шөлейтті аймақ саналатын Ақтоғай мен Аягөз станциялары аралығында өрт қаупі кезеңі басталды деген сөз.
Осы жағдайға ерекше алаңдаушылық білдірген Аягөз жол дистанциясының жолшылары жуырда Аягөз станциясындағы өрт сөндіру пойызымен бірлесіп желі бойында айрықша іс-шара өткізді. Сондай-ақ Аягөз ауданының төтенше жағдайлар бөлімі мамандары да қатысқан бұл шарада өрт қаупі кезеңінің басталуына байланысты жол жиегіндегі өткен жылғы құрғақ шөп пен бұталарды жағу жұмыстары жүргізілді. Бұл бір есептен дала өртінің алдын алу болса, екінші жағынан тілсіз жаумен күресте даярлық жүргізу, жаттығу, жоспарлы жұмыстарды пысықтау болды.
– Аягөз өңірінде жазғы мезгілде дала өрті жиі орын алатынын айта кету керек. Құрғақ климат, жауын-шашынның аз болуы тілсіз жаудың аяқ асты тұтануына себеп болады. Мұндайда желі бойындағы теміржол құрылғыларына төнер қауіп те еселенетіні белгілі. Бұл ретте жолшылар қауымы алғашқы кезекте қырағылық танытып, бірдеңе болса бірден дабыл қағады, – дейді ПЧ-42 директорының орынбасары Болат Мұстафинов.
Жалпы, осыған дейін Семей ЖТ бөлімшесіне қарасты аумақта 2 мәрте орман өрті тіркелген. Өңірде дала өртінің алдын алу бағытында бірқатар кешенді жұмыстар жүргізілуде. НЖС-6 бөлімшесі бойынша дала өрттерінің ықтималдығын төмендету жөніндегі іс-шаралар жоспары бекітіліп, қазірден бастап іске асырылып жатыр.
