Атыраулық теміржолшылар темір жол бойындағы өртті ауыздықтады

Атырау магистральдық желі бөлімшесіне қарасты Құлсары жол дистанциясының жолшылары темір жол бойындағы дала өртін сөндіруге атсалысып, магистральдық желінің және әрлі-берлі өтіп жатқан пойыздардың отқа орануына жол бермеді.

Өндірістік оқыту шебері А. Сисенгалиеваның берген мәліметтеріне сүйенсек, 2026 жылы 26 ақпанда сағат 14:25-те жол диспетчері С. Батыроваға Рзд469-Шоқпартоғай аралығының 1258 шақырымында темір жолға жақын аумақта дала шөбінің жануы орын алғаны туралы хабар түседі. Осы хабарды естіген бойда ол қауіпсіздікті қамтамасыз ету мақсатында аудандық өрт сөндіру бөліміне және де тиісті лауазымды басшыларға хабарлаған. Сағат 14:26-да Құлсары қаласы 101 өрт сөндіру бөліміне және ПД-12 Б. Құрманбаевқа хабар беріліп, телім бастығының орынбасары Ж. Рзабаев, бас инженер С. Қойбағаровқа, дистанция бастығы Н. Байбосыновқа жағдай бойынша ақпарат уақытылы және белгіленген тәртіпке сәйкес жеткізіледі.  

Бас инженер С. Қойбағаров пен жол инженері Н. Қалабай оқиға орнына шұғыл жүріп кетеді де, Рзд469-Шоқпартоғай бекеттері аралығында темір жолдың оң жақ бетінде дала шөбінің жануы орын алғанын анықтайды. Сол бойда телімдегі жолдарды жабуды ұйымдастырып, басқа пойыздарға қауіп төнбеуін қамтамасыз етеді.  

Оған дейін жол диспетчерінен хабар алған Рзд469-Шоқпартоғай аралығының жол шебері Б. Құрманбаев пен бригадир А. Сәдуақас және жолшылар – А. Құлғариев, Б. Айтқұл, А. Маратов, Қ. Молдағалиев, Е. Сайынов оқиға орнына жеткен бойда өртті сөндіре бастайды.  

– Апат айтып келмейді. Дала шөбінің жануы қозғалысқа қауіп келтіргені рас. Сондықтан да оны тез өшіруге тырыстық. Алдымен сол маңда жүрген жол маманы Абат Құлғариев бірінші боп жетіп, өз бетімен өртті сөндіре бастады, сосын біз де жеттік, – дейді жол шебері Бейбіт Құрманбаев.  

Тілсіз жау бір сағат ішінде құрықталды. Дегенмен біраз уақыттан кейін оқиға орнына өрт сөндіру автокөлігімен ПЧ-11 мекемесінің 10 жол жөндеушісі және ЭЧ-қызметкерлерінен 4 адам қолда бар құрал-жабдықтармен өртті сөндіруге жұмылдырылады. Мақат станциясынан №44 өрт сөндіру пойызы да 11 өрт сөндірушімен келіп, өрт сөндіру жұмыстарына қосылады. Осылайша, дала өрті толық сөндіріліп, оқиға салдарынан ешкім зардап шеккен жоқ. Жол мамандарының еңбегі еш кетпей, басшылық тарапынан Алғыс хатқа ие болды.