Қауіпті аймақта қатер көп...

Республикалық «Заң мен тәртіп» идеологиялық тұжырымдамасы аясында бүгінде Семей теміржолында да бірқатар профилактикалық іс-шаралар өткізілуде. Атап айтсақ, кеше қала ішіндегі теміржол өткелдері бойынша «Қауіпсіз өткел» акциясы ұйымдастырылды.

Семей магистральдық желі бөлімшесі қызметкерлері, Абай облыстық көлік прокуратурасы және желілік полиция бірлесіп өткізген акцияның мақсаты жаяу жүргіншілер мен көлік жүргізушілеріне теміржол өткеліндегі қауіпсіздік талабын түсіндіру болатын. Бұл ретте қала ішіндегі ең күрделі аумақ – пойыз қозғалысының жиілігі аса жоғары саналатын «Жансая» базары маңы, ондағы жаяу жүргіншілер нөпірі мол теміржол өткелі бірінші кезекте назарға алынды.  

Іс-шара барысында ұйымдастырушылар жүргіншілерге жол ережелерін түсіндіріп, желі бойынан қауіпсіз өту мәдениеті жайлы кең көлемде ақпараттандырды. Қозғалыс қауіпсіздігі бөлімінің мамандары арнайы ескертпе парақтар таратты. Ата-аналарға каникул кезінде балалардың желі бойындағы қауіпсіздігі жайлы айтылып, сауалдарына жауап қайырылды. Мамандар теміржолдың аса қауіпті аймақ екенін ескертіп, әр жолаушының өмірі ең алдымен сақтыққа тікелей байланысты екенін жеткізді. Жастармен жеке дара әңгіме өрбіді. Себебі қала ішіндегі жылжымалы құрамдардың шұғыл тоқтауына кей жағдайда құлаққап киіп сыртқы әлемнен оқшауланған жастар да себепкер болады екен. Сол тәрізді ұялы телефонға үңіліп, тепловоз сигналын елемейтін жандар да кездеседі.  

– Темір жол өте қауіпті аймақ саналады. Қауіпсіздік талаптарын қатаң сақтау міндет. Мәселен, қала ішіндегі пойыздардың шұғыл тоқтау бойынша өткен жылы жалпы саны 19 жағдай орын алған болатын. Оның жетеуі өлімге алып келсе, екі жағдайда адамдар мүгедек болып қалды. Ал биылғы алты айдың ішінде он оқиға орын алып отыр. Оның екеуі адам өмірінің қиылуына әкеп соқтырды. Шұғыл тежелуге басты себеп – желі бойындағы белгіленбеген жерлерден өту, яғни қауіпсіздік талаптарын сақтамау, – дейді рейдке қатысқан НЖС-6 бас инженері Ерғазы Ережепов.  

Бас инженер қала ішіндегі ең күрделі аумақтарды атап өтті. Олар – орталық базардың маңы, педагогикалық колледждің жаны және «солтүстік тармақтағы» жеке сектор аумағы. Әсіресе балалар мен жастар жүріп келе жатқан жылжымалы құрамның алдынан орағытып тез өтіп кетуге тырысады. Сол тәрізді тоқтап тұрған пойыздың астынан өтетін жанкештілер де бар. Қынжылтары, осы рейд барысында да желілік тәртіп сақшылары мен теміржолшылар өткелге келіп тоқтаған жүк пойызының астынан өтуге әрекеттенген жандарды тоқтатты.