Жеңіске үлес қосқан құрметті теміржолшы
Маңғыстау облысы бойынша меншікті тілші
Жұма Сүйіндіков Маңғыстау локомотив пайдалану депосындағы жалғыз тыл ардагері. Түбекке темір жол тартылып, салаға қажетті мамандарды жан-жақтан жинаған жылдары атамекеніне оралған қандастың бірі. Содан бері қойнауы құтты мекенде тұрақтап, өмірін темір жолмен байланыстырған.
Жеңістің 78 жылдығына орай қарт еңбеккерді локомотив депосындағы әріптестері мен кәсіподақ ұйымының өкілдері құттықтай барып, хал-жағдайымен танысып қайтты. Әңгіме-дүкен құрып, шер тарқатқан қарияның әжім басқан жүзі жадырап, бір жасап қалды. «Маңғыстауда теміржол ашылып жатыр екен дегенді естіп ойланбастан көштің басын осында бұрып, ұрпағымды тарихи Отанына жеткіздім. Көп, бәлкім аз болар, қандай болса да еңбегімді ата-бабам туған жерге, өз еліме жұмсайын деген оймен көрші елден қоныс аудардым. Жаңаөзенге көшіп келіп депоға жұмысқа орналастым. 1966 жылдан 1985 жылы зейнетке шыққанға дейін тепловоз жүргіздім. Зейнеткерлік демалысына жасым келсе де басшылықтың сұрауымен жылдар жинаған тәжірибемді жастарға үйрету мақсатында 1996 жылға дейін жұмыста қалдым», –дейді тыл ардагері.
− Соғыс жылдары балалығын жоғалтқан ағамыз Жұма Сүйіндіков бүгінде Жаңаөзенде тұрады. Депомыздағы жалғыз тыл ардагері. Ел басына күн туған қиын-қыстау жылдары жанқияр еңбегімен Жеңісті жақындатуға үлес қосқан ұрпақ өкілі. Тыл бекем болмаса, майданға қажет дүниелер жеткізіліп тұрмаса, жеңіске жету де қиын болған болар ма еді. Сондықтан ардагерлердің еңбегін бағалап, хал-жағдайын біліп, хабарласып тұру – біз үшін қашанда міндет, – дейді Маңғыстау локомотив депосының кәсіподақ комитеті төрағасы Әбілсейт Набиханов.
Қарт машинист 1930 жылы Түркіменстанның Красноводск облысында дүниеге келіпті. Соғыс басталғанда орта мектепті оқып жүрген, 12-13 жасынан еңбекке араласады. Соғыс біткеннен кейін Краснаводск қаласындағы ФЗО-да алты ай оқып тепловоз машинисінің көмекшісі болады. 1950 жылы Кеңес армиясы қатарына шақырылып, борышын Новосибирскіде өтейді. 1954 жылы әскерден оралысымен Мары қаласында машинист мамандығы бойынша жарты жылдық курстан өткесін 1954-1960 жылдары тепловоз машинисі болады. 1960 жылы Ашхабад қаласында машинист мамандығы бойынша білімін тағы он ай шыңдап, 1966 жылға дейін Түркімен теміржолында жұмысын жалғастырады. Атамекенге қоныс аударғасын да түбекте отыз жылға жуық машинист болып еңбек етеді.