Мерекелік сурет байқауы
«Қазақстан теміржолшысы» газетінің тілшісі
1 маусым – Халықаралық балаларды қорғау күніне орай «Жолаушылар тасымалы» АҚ «Экспресс» филиалының бастауыш кәсіподақ ұйымы теміржолшылардың балалары арасында «Мен бақытты баламын» сурет байқауын ұйымдастырды.
Байқауға филиал қызметкерлерінің 6-13 жас аралығындағы дарынды балалары қатысуда. Олардан бүгінде 100-ге жуық суреттер келіп түсті. Кәсіподақ ұйымының төрағасы Эльмира Егембердиеваның айтуынша, «Экспресс» филиалында барлығы 1480 теміржолшы еңбек етеді. Сол қызметкерлердің балаларын мерекеде қуантып, ерекше атап өту мақсатында осы шығармашылық байқауы ұйымдастырылып отыр. Талантты балалардан суреттер 15-31 мамыр аралығында қабылданады. Келіп түскен суреттер филиал ғимаратының фойесінде ілініп жатыр. Балақайлар берілген тақырып аясында қылқаламның көмегімен отбасындағы бақытты сәттер, теміржолшылар әулеті, жол бойындағы станциялар және басқа да әсерлі сәттерді бейнелеуге тырысқан.
Байқау қорытындысы 2-4 маусым аралығында шығарылады. Жеңімпаздарға «Балалар әлемі» дүкеніне сертификаттар тарту етілмек.
