ҚТЖ Мойынты станциясындағы локомотившілердің еңбек және демалыс жағдайларын жақсартты
Мойынты станциясында локомотив бригадаларының демалыс үйі мен локомотивтерді техникалық байқау пункті ғимаратына күрделі жөндеу жұмыстары аяқталды, деп хабарлайды Rail-news.kz.
Жобаны іске асыру барысында өндірістік және тұрмыстық үй-жайлар жаңартылып, инженерлік коммуникациялар жаңғыртылды, ғимараттың солтүстік қанаты пайдалануға берілді.
Жүргізілген жұмыстар арқасында демалыс үйінің сыйымдылығы үш еседен астамға – 20-дан 68 төсек-орынға дейін ұлғайтылды.
Локомотив бригадаларының демалуы үшін заманауи және жайлы жағдайлар жасалды, бұл еңбек сапасы мен тасымалдау процесінің қауіпсіздігін арттыруға ықпал етеді.
Мойынты станциясының локомотивтерін техникалық байқау пункті 1982 жылы пайдалануға берілді. Нысан 2005 жылы қайта іске қосылғаннан кейін ғимаратқа күрделі жөндеу жұмыстары алғаш рет жүргізіліп отыр.
Локомотив шаруашылығы объектілерін жаңғырту компанияның жұмыскерлердің еңбек жағдайларын жақсарту және өндірістік инфрақұрылымды дамыту жөніндегі жүйелі жұмысының бір бөлігі болып табылады.
