Алтынкөлді дамыту жоспары

Алтынкөл – Қазақстанның Қытаймен мемлекетаралық шекаралас түйіспе станциясы. Сондықтан да бұл маңызды торап Қазақстан мен Қытай арасындағы жүк тасымалдауда, сондай-ақ Иран, Парсы шығанағы және Еуропа елдеріне жүк тасымалдауда шешуші рөл атқарады. Осыған орай, Алтынкөл станциясын әрі қарай дамыту жоспарлануда.

Атап айтсақ, шекаралық станцияда 2025-2026 жылдары қосымша жолдар мен сұрыптау жүйесін салу жоспарланып отыр. Бұл туралы «ҚТЖ» ҰК» АҚ Алматы жүк тасымалы бөлімшесі филиалында Қытаймен шекарадағы негізгі логистикалық хаб – «Алтынкөл» станциясын дамыту мәселелеріне арналған жиында кеңінен сөз болды. Қатысушылар алдын ала жобаны талқылап, ұсыныстарын білдірді. Жобада 1435 мм табаны бойынша (тар табанды) 4 қосымша қабылдап жөнелту жолдарын салу, тартымдық жолдарды салу қарастырылған. Бүгінде бұл мәселеге қатысты ізденіс және жобалау жұмыстары жүргізілуде екен. Ал 1520 мм жол табаны бойынша «Б» жаңа экспорттық паркінің 6 қабылдау-жөнелту жолы төселген, қазіргі таңда жолды түзету және оларды МПЦ жүйесіне қосу жұмыстары жүргізілуде.  

– Сонымен қатар қуаттылығы төмен дөңесі бар сұрыптау паркін салу жоспарланып отыр. Осыған орай, жобалау жұмыстары басталды. Қазіргі таңда Жетіген – Алтынкөл телімінде ауқымды жұмыстар қолға алынған. Атап айтсақ, 8 бірлік қолданыстағы станциялар мен разъездерді, соның ішінде, Алтынкөл станциясын жаңғырту, бұдан бөлек Жетіген – Құрөзек, Алтынкөл – Иінтал араларында екінші жолдарды салу қарастырылған. Бұл жобалардың барлығы аяқталғаннан кейін Жетіген – Алтынкөл телімінің өткізу қабілеті 18 жұптан 30 жұп пойызға дейін өсетін болады. Соның ішінде кең табанды жол бойынша Алтынкөл станциясының өткізу қабілеті 18-ден 33 жұпқа дейін, ал тар табанды жол бойынша 20-дан 30 жұп пойызға дейін артады. Бұл станцияның экспорттық және транзиттік әлеуетін күшейте түседі, – деп станцияның даму жоспарымен бөлісті Алматы жүк тасымалы бөлімшесі директорының бірінші орынбасары Нұржан Құрманәлиұлы.  

Жалпы биылғы жылдың бес айында Қазақстанда темір жол бойынша жалпы жүк тасымалы көлемі өткен жылдың есепті кезеңімен салыстырғанда 11,9% өскен. Ал темір жол бойынша жүк айналымы 13,6% артып, 229,4 млрд тонно-километрге жетіп жығылған. Соның ішінде, Алтынкөл арқылы Қазақстан мен Қытай арасындағы тасымал көлемі 14,2 млн тоннаны құрап отыр, бұл көрсеткіш өткен жылдың есепті мерзімімен салыстырғанда 11% артық. Ал Алтынкөл арқылы Қазақстаннан Қытайға бағытталған экспортқа келсек, ол 12% өсіп, 9 млн тоннаны құраған.