Атырау жүк тасымалы бөлімшесінде өндіріс көрсеткіштері толығымен орындалып жатыр
Атырау жүк тасымалы бөлімшесі бойынша 2018 жылдың 12 айында жүк айналымы техникалық жоспар бойынша 9329,4 млнткмнеттоны құрап, жоспар 92,9 пайызды құрады. Өткен жылмен салыстырғанда барлық 16 көрсеткіш толық орындалды.
Мәселен, пайдаланым жүк айналымы – 104,7%, жүк тиеу – 108%, жүк вагоны өнімділігі – 121%, вагонның орташа тәуліктік жүрісі – 116,5%, жүк вагоны айналымы 121%, жергілік вагон айналымы – 107,4%, вагонның статистикалық салмағы – 101%, тиеулі вагонның динамикалық салмағы – 101,2%, бос жүк вагонының тиелгеніне шаққандағы жүріс пайызы – 105,6%, бір жүк операциясына вагонның тұруы – 144,6%, бір техникалық станцияда вагондардың тұруы – 113,2%, локомотив өнімділігі – 103,2%, локомотив жүрісі – 102%, пойыздың орташа салмағы – 1001, пойыздың учаскелік жылдамдығы – 101,9%, пойыздар қозғалысының техникалық жылдамдығы 107,7% болып орындалды. Жоспардың осындай көлемде орындалуына вагондардың жүк паркін сапалы пайдалану, жүк вагондарының өнімділігін, жүрісін арттыру, т.б. жағдайлар ықпал еткен.
Атырау жүк тасымалы бөлімшесінің техникалық бөлім бастығы Темірхан Аманқұловтың айтуынша, Басқарма жоспарына сәйкес пайдаланым жүк айналымы 150,6 млнткмнеттоға кеміген, немесе 1,6%. Техникалық жылдамдық 0,08 км/сағ, 0,2 пайыз кем. Техникалық жоспар бойынша жүк тиеу 537,3 мың тоннаға немесе 5% кеміген. Жүк тиеу көлемінің бұрынғыдан сәл-пәл кему себебі негізгі жүк жөнелтуші «Теңізшевройл», «Батыс Транс Групп» ЖШС тарапынан мұнай өнімдерін жіберу азайып кеткен. Яғни, зауыттың күкірт түйіршіктейтін қондырғысында жоспарланбаған жөндеу жұмыстары жүргізіліп, жұмыс тоқтаған. Сондай-ақ, «Теңізшевройл» кәсіпорнында жөндеу, Атырау мұнай өңдеу зауытындағы мұнайды терең өңдеу кешенінде қосу-реттеу жұмыстарының жүргізілуіне байланысты мазут, газойль сынды мұнай өнімдері зауыттан аз тиелген.
Сонымен қатар, аталған мерзімде транзитті тасымал көлемі де азайғаны байқалады. Бөлімше бойынша 4 пойыз, 2 пойыз Қиғаш түйіспесінен, бір-бір пойыздан Сағыз бен Құлсары түйіспесінен пойыздар кем алынған. Нәтижесінде тиелген вагондар жүрісінің вагон-шақырымы 5-7 пайызға азайған. Пойыздар қозғалысының техникалық жылдамдығының кемуі жылдамдықты азайтуға берілген ескертумен байланысты. Биыл Мақат-Атырау учаскесінде күрделі жөндеу жұмыстары жүргізілуіне және Мақат-Құлсары учаскесінде шпалдар ақауы болуына орай, сонымен қатар қараша айында желдің қатты үдеуіне қарай жылдамдықты кеміту орын алған.
Соған қарамастан, бөлімше жоспар үдесінен шығып отыр. Жалпы, вагон арқылы келіп-кететін халық тұтынатын тауарларды айтпағанда, өңірде «Нұрлы жол» бағдарламасы орындалуда, оған қоса мұнай өндіруші «Теңізшевройл» ЖШС өнім көлемін ұлғайтуда және 3-ші деңгейлі зауыт салынып, оған 25 мың жұмысшы тартылуда. Атырау мұнай өңдеу зауыты да кеңейтіліп, онда жоғары октанды бензин өндіріліп, мұнайды тереңдетіп өңдеу кешені жұмыс жасауда. Қашаған кен орнынан шыққан мұнайды өңдейтін «Болашақ» зауытында да үлкен құрылыстар жүргізілуде. «Нұрлы жол» бағдарламасына сәйкес Атырау-Астрахань, Атырау-Ақтөбе автожолдары биыл қайта жөнделеді. Оған қажетті жабдықтардың бәрі, әрине, темір жол арқылы тасымалданатыны белгілі. Қазірдің өзінде Аққыстау, Жантерек станциялары аумағына сол құрылысқа қажетті вагондап шебін, топырақ түсірілуде. Мұның бәрі өлке темір жолының еңбек өнімділігін арттырып отыр.
Қосұйым Мұқашев, Атырау