Айыппұл төлеуде

Мұнайлы аймақта мұнай өнімдерінің тасымалдану көлемінің азаюы темір жол арқылы жүзеге асырылатын өңірдегі жүк тиеу-түсіру көлеміне әсер етпей қоймайды. 

Мәселен, Құлсары станциясынан сұйытылған газ, пропан-бутан, Қарабатан станциясынан түйіршіктелген күкірт тиелген цистерналардың экспортқа мерзімді уақытта жіберілмеуі өткен 8 айда жүк жөнелту көлемінің азаюына себеп болды. Соның себебінен, әрине, вагондардың игерілмей қалуы орын алуда.

Алайда, жүк жөнелтуші компаниялардың вагондарды игермеуіне сәйкес, келісімшарт талабына орай олардан айыппұл өндіріліп отырады. Мысалы, биылғы жылғы 8 айда Құлсары станциясынан 3721 вагон/129447 тонна сұйытылған газ бен пропан-бутан өнімдерін, 988 вагон химикатты игермегендігі себепті «Теңізшевройл» кәсіпорнынан 7347860 және 3662276 теңге, Теңдік станциясынан «БатысТранс Групп» ЖШС мұнай өнімдеріне тапсырыс берген 8511 вагонды игермегендігіне сәйкес 34496405, 930 вагон химикат үшін 3799110 теңге айыппұл өндірілсе, жүк жөнелтуші «Парк хранения сжиженного газа» ЖШС-нан 648 вагонды игермегендігі үшін 2676785 теңге, сол секілді Қарабатан станциясынан «Тенгизская Транспортная Компания», «Исткомтранс» ЖШС-нан да химикатқа берілген 420 вагонды игермегендігі себепті 1738710 теңге айыппұл өндірілген. «Әрине, айыппұлмен мәселе түбегейлі шешілмейді, сондықтан да біз жүк жөнелтушілермен қарым-қатынасымызды нығайтып, мұнай мен мұнай өнімдерін темір жол арқылы уақытылы тасымалдауына жұмыстанып жатырмыз» дейді Атырау жол бөлімшесінің бас инженері Бауыржан Картан. 

Жүкжөнелтушілердің жүктен бас тартуына зауыттардың жөндеу жұмыстарына тұрып қалуы да ықпал еткен. Мәселен, Атырау мұнай өңдеу зауытының 16 наурыз бен 17 сәуір және 1 шілде мен 31 тамыз айларында тұтастай екі айға жоспарлы жөндеу жұмыстарына тұруы, ТШО зауытында газ тазалау қондырғысының жөндеуге тұруы мен «Норт Каспиан Оперейтинг Компани Н.В.» зауытында күкірт конвейерінің сынып қалуы мұнай өнімдері тасымалының кемуіне, вагондардың игерілмеуіне, бос қалуына себепші болды.